Arsenal chuan hnehna changin Manchester City um phak rih lo mah se Premier League-ah an beiseina a la chuai bik lo. Pathianni zanah Champions League khelh phak ngei tuma tan la mek, Newcastle United chu St James’ Park-ah si hnih faiin an hneh a, khelh thum an la neihah point khatin hmahruaitu an la phak lo.

Mikel Arteta team hian Inrinni zana Leeds United laka City an chak hnuah  nomawi chuh ve turin chak ngei ngei ngai chungin Tyneside an pan a, an duh an hawn.

Newcastle hi season thara Champions League khelh tum an nih avangin bul tan phat atangin an tal na a, Jacob Murphy chuan ban tihperin penalty an hlawh tep a, VAR hmanga ennawn hnuah hnawl a ni.

Mahse, Arsenal awm mai mai bik lo va, captain Martin Odegaard chuan Nilaini zana Chelsea laka goal hnih a thun chu chhunzawmin minute 14-naah league-a a goal 15-na thunin pen 25 vela hla atangin keeper Nick Pope a pet tlang.

Inkhel a nung a, khawi lam lam pawhin chanve tha an nei zut a. Chawlhlawk hmaa langsar ber chu Pope a ni a, Gabriel Martinelli, Bukayo Saka leh Odegaard te pet a dansak a, chawlhlawk hnuah Martinelli hian goal kham a tihper bawk.

Arsenal keeper Aaron Ramsdale tan pawh hna hautak a tam a, Joe Willock leh Fabian Schar-a te pet a dan bakah Alexander Isak chuan ban a tihper a; mahse, minute 71-ah Martinelli chuan ball tha taka la lutin a laia a pet luh kawh tak chuan Schar-a’n an lamah lo dang lutin point thum an hawn.

London team hian khelh hmabak vawi thum la neiin champion lai leh champion leh tum, City chu point khatin an la phak lo va. Pep Guardiola team hian khelh li an la nei ve thung a, an hmabakah hian an mualah tlak hlau Everton leh Brentford an la mikhual dawn a. Team liana ngaih Chelsea leh Europe-a inlan phak ngei tum, Brighton an la tlawh dawn bawk a, heng atanga point an hloh chu Gunners-in an chân mek a ni a, beisei tihbona chi a ni lo.

Arsenal ve thung hian an mualah Brigton leh Wolves mikhualin tlak hlau, Nottingham Forest an tlawh dawn bawk a, point hloh a thiang tawh lo.

Pathianni zan inkhel result hi Arsenal tan a lawmawm laiin Magpies tan erawh dinhmun tiderthawngtu a ni a. An hnuai chiahah Manchester United chuan an khelh zawh chiahah West Ham United tlawhin point thum an hawn chuan an lehpel dawn a, palinaah an tla ang.

Palina niin an tum ber, Champions League khelh thei dinhmun la luah mah se an khelh hnuhnung vawi ruka chak vek, panganaa awm, Liverpool-in point thum chauhvin an thlau tawh rih a, pathumnaa insawh nghehna remchang an hloh hi an tan a uiawm hle ang.