Arsenal chuan, an squad tichak turin tun summer transfer window chhung hian player thar lakluh ngei an tum a, Position hrang hrang tihchak an mamawh rualin a bikin an attacking leh midfield lam thuam chak an tum nia sawi a awm. Tun transfer chhung hian Gunners chuan Leicester City star Youri Tielemans lakluh an tum dawn niin The Sun chuan a sawi. 

North London club hian hun rei tak atang tawh khan Leicester City midfielder hi an lo hmutai tawh a ni awm a, tunah pawh hian £40 million vela lei turin thui tak an indawr tawh niin an sawi. Youri Tielemans-a thuihhruaite chuan season tharah chuan Arsenal player a nih ngei tawh tur thu sawiin Emirates lam pan tura an inpeih tawh thu an sawi mauh mai. 

Gunners hian Thomas Partey-a awmloh laiin Mohamed Elneny chu midfield-ah Granit Xhaka nena inkawp turin an chhawr a, chutih rualin Egyptian hi thla thar June thla mai khian a contract a zo tawh dawn lehnghal a, khel zawm tura inbiak remna ala awm loh bawk vangin free agent tur pawha chhuah an pawi tilo a ni mai thei. 

Kum 2019-a Foxes a zawm hnu khan, Tielemans hi team tan player pawimawh a ni chho nghal a, mual chhunga inkhelh thununtu ber niin an khelh dan thlak danglam a ngaih chang pawha game thlak danglam thei ber tu a ni. Mual laiah mai nilovin Belgian hian defence lamah pawh a pui tel thei a, tlar hnung lam tan pawh thlamuanpui tham a tling ngei ang.

Mikel Arteta tan, kum 25 mi Tielemans hi a tangkai leh em em chhan tur pakhat chu midfield atanga goal khung theitu a ni tel bawk hi a ni a, Leicester City tana competition hrang hranga game 154 a inlan tawhah goal 24 thun tawhin assist 23 a nei tawh bawk. 

The Sun sawi danin, Arsenal leh Belgian Tielemans te indawrna kawngah hian inrem lohna lian tham a awm hran lo va, Champions League an khelh phak hlauh a nih phei chuan thlem nuam tak turah an ngai. Chutih rualin, Gunners lam hi Premier League-ah top-four an ni phak lo hlauh a nih erawh chuan Tielemans hi Real Madrid lamin a chhuh daih thei bawk.

May ni 13 Zirtawpni khian Tottenham Hotspur leh Arsenal te hian north London derby an khel dawn a, he match hian season thara Champions League khel zawk tur team a hril thui hle ang.