Premier League-a season tha tak hmang mek Arsenal chuan an defender duhlai Gabriel chu 2027 June thla thleng daih contract thar an ziahpui.

Arsenal-ah hian Brazilian defender hian kum 2025 June thla thleng contract a la nei sa hrim hrim a, kum hnih dang a contract hi an pawhsei sak a, tunah chuan thlamuang takin a awm thei tawh dawn a ni. 

Kum 2020 September thla khan Lille atangin pound maktaduai 24 bawr vel sengin kum 24 mi Gabriel hi Arsenal hian an lalut. Gabriel hian Arsenal tan match 81 a khel tawh a ni.

Arsenal hian season duhawm tak an hmang mek a, tun season chhungin game khat bak tlawm la nei lo. Goal an chhuah tlem bawk a, goal an chhuah tlem chhanah hian Gabriel hian a thawh hlawk hle a, Saliba nena inkawp an chetha hle a ni. 
    Premier League-ah Gunners hian game 10-ah  point 27 hlawhchhuak tawhin hmahruaitu an ni mek a, Europa League-ah pawh hneh loh nei lovin knock-out stage an lut tawh a ni.

 Gabriel chu Arsenal manager Mikel Arteta chuan a fak hle a,“Nitin kan thawk dun a, amah hi ka hre chiang a, a la naupangin a taima a, hmasawn tum tak a ni bawk. Amah vang hian kan tlarhnung a phui a, Saliba nena an inkawp ngat phi hi chu duh thusam an ni. Kan central defender te pahnih hi an inchawm tawn thiam a, an kawppui te nen an thawk dun thiam a, player tha zawkah a in chher a ni ringawt a lawm.

Level sang zawk leh nomawi kan hum theihna turin anni pahnih hi kan team tan an tangkai em em a, kan innghahna pawimawh tak an ni,” a ti.