Point nga laiin hma an la hruai a; mahse, khelh hniha Manchester City aia an khelh tam zawk rih miau avangin Arsenal tantute deuna tawngkam lar, ‘season lehah’ tih chu an tan a ri thar leh mek.

Gunners hian Zirtawpni zanah Premier League mawngphaha awm, Southampton chu 3-3 in an hnehtawk thei hram a, inkhel vawi thum a zawnin an tumpui an hnehtawk ta a, point ruk hlu tak an hloh ta.

Emirates Stadium-a inkhelah hian tan chiahah Aaron Ramsdale chuan a hma zan chiaha Manchester United keeper David de Gea tih dan ‘a zir a,’ Carlos Alcaraz-a goal a khilai!

Theo Walcott-a’n a club hlui lamah a thun belh a, Gabriel Martinelli-a’n si khat a sut then hnuah Duje Caleta-Car chuan Saints hmahruaina a nemnghet nawn a, minute 88 leh 90-ah Martin Odegaard leh Bukayo Saka ten Arsenal tan point an hlawh chhuak ta hram chauh a ni.

Arsenal hmahruaina hi la tam angin lang mah se an hnuaia umtu hi inelna hrang hranga an inlan hnuhnung vawi 11-a vawi 10 chak thei, champion lai, City an ni miau mai si a, Gunners tantute tan ‘season lehah’ tih a ngai tak tak ang tih a hlauhawm ta hle.

Data analyst Nielsen’s Gracenote-in Euro Club Index an siamah chuan Southampton nena 3-3 an inhnehtawk hnu khan Arsenal champion theihna chance hi 32% atangin 21%-ah a tlahniam nghal dawrh.

City ve thung hi Zirtawpni zan inkhel result avang bawk hian a zawna a vawi thum nan league nomawi an lak lehna chance chu 79%-ah a chho ve thung.

Eng pawh ni se, Nilaini zanah Etihad Stadium-ah an inkhel dawn a, a tu ve ve tan pawh ‘final’ a ni dawn a. Arsenal hian kum 2015 hnuah league-ah City an la hneh leh miah lo tih hre tel bawk ila.

Tun season-ah vawi hnih an inkhel tawh a, January-ah City hian FA Cup-ah 1-0 in an hneh a, February-ah league-ah 3-1 an hneh nawn leh.

Thil thleng tawh atangin Arsenal tan chanchin lawmawm a awm ve tho va. Opta-in a chhinchhiah danin England-a league sang berah vawi 30 inkhelha point 73 hmu phak team 13 chu an champion zui a, champion zo ta lo pahnih chauh an la awm a. Manchester United (2011-12) leh Liverpool (2018-19) an ni.

Mahse, heng season hniha champion khalh zui ta daihtu hi City ve ve an la ni leh talh tho!