Aizawl February 27, 2023: Vawiina Mizo Hnam Run chhung inkhawmah ZOHANDCO Chairman C. Lalrammawia, Adviser MNF Gen. Hqrs nibawk chuan thu sawiin, "Kan hnam dinchhuahna atan MNF hian kawngdik a zawh char char a. Hnam thuthlung puang thinte puan danin Arsi leh Kutphahin mawhphurhna an nei a. Lukhum in mawhphurhna a nei ve lo. Kaiten lam hawia pheikhai rual taka ke kan chheh zel chuan MNF bawk kan sawrkar leh ngei dawn a ni," a ti. 

Mawitea chuan, "Pu Laldenga khan harsatna tam tak paltlangin Hnam movement a kalpui a. Mizo hnam chi tuhin a ti thanglian a ni. India intelligence service hrang hrang hmangin bei thin mah se, Pathian humhimna a chak zawk. Ralthuam hmangin kan hnam humhim a tul tih a hre bawk. Mizo Hnam chawrno mek, a zikno sihchhumna atan hmanraw hrang hrang awm thin mah se, Pathianin min humhim tlat zel a ni. Pu Zoramthanga'n Pu Denga kawr ang chiah hain, economic movement a kalpui chho leh a. Ei leh bara intodelh na atan hma lain, chumi atana pawimawh kawngpui sial hna chak takin a thawk a ni. Mi inzir peih mi anih avangin sum enkawl kawngah pawh sawiselna a awmlo a. Mau/Rua pawh kan hlawhtlinpui ngei dawn a ni," a ti. 

MNF Adviser chuan, "Kum 60 chuang nghet taka ding, thang zel tur MNF hi inkaihhruaina fel tak nei, 'Pathian leh kan Ram tan', tia innghat a ni a. Hnam Run-a mawhphurhna neiten chu Hnam thuthlunga phuarkhawm kan nih angin kan lungrual thin a. Thochhuak leh mailo tur Congress hi huphurh tham an nilo a. ZPM lah an til heuh heuh reng a, anmahni chhungkuaah inbeihna a natzia kan hmu. Chuvangin, theihtawp chhuaha kan beihzel chuan MNF bawk hi a sawrkar leh ngei dawn a ni, a ti.

He hunah hian Dy. Gov't Chief Whip Lalrintluanga Sailo, MLA, MNF Gen. Hqrs. Adviser chuan Mizoram Legislative Assembly Budget Session kal mek chungchang report a pe a. Rintluanga chuan, "Session kal mekah MNF Legislator ten theihtawp chhuaha lungrual taka kan beihna azarah opposition lam kan bawhbet zel a. Opposition lam ten min beihna tur an hre manglo a ni," a ti. Dawt ngialngan leh thu belhchian dawllo hmanga min beihna te chu a dik lohzia hailan a ni zel a ni, a ti bawk.