Aizawl; HIV/AIDS enkawlna Antiretroviral (ARV) damdawi chu kar 3 daih awrh chauh India in a nei tawh a, hmanhmawh taka company 1 siamtir ni mahse, November thla tawpah chauh a siam zawh beisei a ni a, thla 1 chuang chatlak a awm dawn tho niin kan thulakna chuan a tarlang a. MSACS chuan thla khat 1 ei vel an la neih thu ZALEN an hrilh bawk. “Central lama buaina a awm chuan state min nghawng lo thei lo a, tih theih a tlem hle a, mahse tunah chuan thla 1 ei kan la nei,” tiin Dr Lalmalsawmi, Project Director, MSACS chuan Zalen a hrilh a. Tunhma atang tawhin MSACS hian ARV chatlak a awm lohna turin Central lama an hotute hnenah an thlen tawh thin a. “Nagaland Conclave kan neih khan Joint Director, NACO chuan he damdawi siam tur hian company te’n tender-an chhang a, an inchuh nasa a, sum virvel a tam avangin a tawpa inhnukdawk leh inthun thutte awm thinin khaihlak a awm duh phah thu palaite hmaah a sawi tawh a. ARV hi Central atanga lei a ni si a, kan state tan chuan tih theih a awm lo ang’” tiin MSACS hotu chuan Zalen a hrilh a ni. Zawhna chhangin Dr Malsawmi chuan “ARV hi nghei chi a ni lo a, hun rei tak an nghei chuan HIV hrik chu nasa takin taksaah a pun phah thei zawk a ni,” a ti bawk. Reuters in a tarlan danin ARV khaihlak tur hi NACO chuan January khan a thlen tawh a, dawhkan paltlang tur a tam avangin siam phalna an hmu lawk thei lo a ni. October ni 1 atang khan sawrkar nen an inremna angin Aurobindo Pharmaa (AR BN.NS) chuan a siam tan tawh a, November thla hmaa peih hman tum mahse a siam chhung hian ni 60 tal a duh a ni. November thla tir lamah ARB.NS hian an zawh loh chuan chaklak a awm thei a ni. ***Thla 1 ei a la awm :Mizoram SACS ***ARV hi 2004 atangin a thlawna sem a ni ***Aizawl-ah lei tur awm lo a hnai ber Guwahati ***Market-ah ARV a to. ***India in HIV/AIDS vei Nuai 21 a nei. ***South Asia AIDS thi zinga (2012)a zatve chu Indian an ni. ***PM Modi chuan campaign nan hriselna enkawlna tha zawk a lo tiam tawh. Tunah hian sawi a kai tan.