Manager Mikel Arteta chuan David Raya lakah England international goalkeeper Aaron Ramsdale-a’n a dinhmun hloh mah se Arsenal chhuahsan lo se a duh thu a sawi.

Raya hian nipui lai khan loan-in Brentford atangin Gunners a zawm a, Ramsdale hi No. 1 nihna a chhuhsak zui nghal.

England tan pawha vawi li khel tawh, kum 25 mi, Ramsdale-a hian September thla tir lam atang khan club tan vawi thum chiah a la inlan a, tunah hian Newcastle nen sawi zawm mek a ni.

Arteta chuan, “Aaron hi la awm se ka duh,” a ti.

“Goalkeeper tha tak pahnih neih hi nuam ka ti a, Aaron pawh la awm zel se ka duh a. That zawk zel kan duh a, kan neih sa bak belhtu pawh min awl zel se kan duh a, chu chu kan khawhawi chu a ni,” a ti.

Ramsdale hian 2022-23-a Manchester City nen nomawi an inchuh tum khan season tluan khan Premier League inkhel vawi 38-ah Gunners tan a inlan chhuak vek.

2023-24 season tan tir lamah pawh No. 1 la ni chhunzawmin league inkhel hmasa paliah bul a la tan a; mahse, Raya a lo thleng a, September 17-a Everton an hmachhawn tuma khelhtir a nih hnuah a hmun a chhuhsak thei tawh lo.

Hemi hnuah hian Carabao Cup inkhel pahnihah England keeper hi a inlan phak hram a, Premier League-ah pawh Raya hi amah neitu a hmachhawn a rem loh avang chauhvin Brentford lakah a inlan bawk.

Newcastle manager Eddie Howe hiankum 2017 daih tawhah khan Ramsdale hi Bournemouth atangin a la lut a, tunah pawh a ngaihven leh nia sawi a ni a, January thlaa lak nghal vut vut a tum nia sawi a awm a. Magpies goalkeeper Nick Pope chu Inrinnia Manchester United laka si khat faia an chak tum khan a dar a tipelh a, a aiawhtu a mamawh hle a ni.

Chhuak lo se a duh avangin thla thara thlasik bazarah Ramsdale hi a chhuak dawn lo tihna a ni thei em tia zawhna chu Arteta chuan, “Tumah chhuak lo se ka duh. Tunge Arsenal player zingah January-a min chhuahsan tur ka sawi thei lo va, kum thum lo awm leh tur chhungin tunge la awm ang tih pawh ka sawi thei lo bawk,” a ti.

“Tumah Newcastle lamah an kal dawn lo tih pawh ka sawi thei chuang lo va. In lo sawi a nih pawhin kei chuan ka sawi lo vang. Tumah January-a chhuak tur hian ka ti lo va, Newcastle a ni emaw, club dang pawh ni rawh se, chhuak se tumah ka ti lo,” a ti.