ZALEN November 18, 2024 : ASEP General Headquarters, Aizawl chuan vawiin khan Cloudnine Restaurant-ah General body meeting neiin Winter Operation for Wildlife Conservation kalpui mek chungchang thlirhona neih a ni a, resolution pahnih an pass a, Vairengte - Sairang Four lane a siam chu a taka kalpui loh ni se an tih a tel.

1. Vairengte – Sairang Four-lane kawngpui laih chungchang : Vairengte – Sairang four-lane kawngpui laih tur ruahmanna awm mek chu kan ram environment tan nghawng nasa tak nei thei tur a nih avangin ASEP chuan fourlane kawngpui chu awhawm hle mah se, a taka kalpui loh nise kan duh a. Kan ram mil tawk leh tha taka enkawl two-lane ah lungawi zir zawk ila tih hi kan duh dan a ni.

Kan ram leilung pianken hian four-lane meuh hi chu a zo lo va, leivung paihna tur a awm lo va, chhiatna a la thlen theih tur zawng zawng te, kan ramngaw leh nungchaten an tawrh nasat dan tur leh kan lui leh a chhunga awm lui nungcha tinrengte tawrhna thleng tur zawng zawng ngaihtuah hian kan ram tan a him lo a ni tih hi sawrkar leh Zoram mipuite pawhin hria ila kan duh tak meuh a. Four-lane kawngpui hmalakna hi chu kaltlang pui a nih lohna tura theihtawp chhuah turin kan sawrkar kan ngen tak meuh meuh a ni.

2. Silai tha nena ramvah chingte chungchang: Thlasik hun kan lo thleng leh ta a. Mi tam tak chu silai tha nen ramvah an ching leh tan ta mek a. Khawpui mite pawh thingtlang lamah thurualpui neiin an fehchhuak nasa thin a. Hemi chungchangah hian thingtlang lam unaute pawh hetianga sapel/ramvah chingte thurual puitu ni lo tur leh ramvah chingte pawh lo khap ngam hial turin ASEP chuan kan ngen a.

Khawpuia chengte pawh demand siamtu ni lova lei lo ngam turin kan ngen tak zet a. Sawrkar pawh khauh zawka hmalakna kalpui turin kan ngen tak meuh meuh a ni.