Aizawl; Nimin chhun khan ASEP General Headquarters chuan Maubawk daiah Vaki pathum an chhuah zalen a, heng vaki te hi ASEP Facebook group member Rebek Lalbiaknungi’n thahnemngaihna avanga mi khawi lai a lo dil te an ni a, Vaki hi MJA Vice President Zonunsanga Khiangte chuan a chhuah zalen a ni. Vaki chhuah zalen tu MJA Vice President Zonunsanga Khiangte chuan, “Kan ram nungcha hlu tak takte hi kan humhalh tlat a tul tawh a, kan zavaia kan tan tlan theuh a pawimawh tak zet zet a. Kan nunhluite kalsan a, nungcha humhalh duhtu kan pung zel hi a lawmawm a, vawiina vaki chhuah zalenna pawh hi tha ka tiin, midangte thinlungah a tha zawngin rahtha a chhuah ngei ngei ang tih ka beisei tlat a ni,” a ti. ASEP President K. Lalmuansanga pawhin, “Nungcha khawi, vulh, lei leh hralh reng reng hi The Wildlife (Protection) Act, 1972 chuan a khap tlat a, tumahin kan vulhin kan khawi tur a ni lo a, dan bawhchhia kan ni. Nungchate hi ramhnuaia awm tura Siamtu’n a siam ang tak hian an awmna tur dik taka an awm hi a tha ber a, mahni ina lo duat tum hi duatna dik lo leh an tan chuan hremna ang hial a ni thei a. Ramhnuaiah zalen taka awmtir hi humhalh dan tha ber a ni,” a ti ve bawk.