Aizawl July 1, 2024 : African Swine Fever hri lengin district a tuam dan a nep deuh tan niin a lang a, Aizawl leh Serchhip district chu a hluarna a la ni a, district thenkhat chuan an tuar nep deuh tan niin a ngaih theih.

Ni nga kalta khan district pahnih Aizawl leh Serchhip bakah Khawzawl leh Kolasib district-ah te ASF avangin vawk thi leh tihhlum an nei a, district dangah erawh a nep deuh. June 28-ah khan Aizawl leh Serchhip bakah ASF avangin vawk thi an awm lo a, Zirtawpni khan Khawzawl district-ah vawk pahnih a thi leh a, a bak chu Aizawl leh Serchhip district a thi te an ni. Chutihrualin rinhleh vanga tihhlum (Culled) chu an awm reng thung.

Pathianni khan vawk thi report 21-a awm a, vawiin khan vawk thi 118 a awm leh a, Serchhip leh Aizawl district a mi te vek an ni. Vawk tihhlum/ suat erawh an awm reng a, vawiin khan Aizawl, Khawzawl, Serchhip leh Kolasib-ah vawk tihhlum 222 an awm.

Kumin January atanga July 1, 2024 thleng hian Mizoram-ah ASF avanga vawk thi hi 4068 an awm tawh a, hri kai rinhleh tihhlum (Culled) hi 7871 an awm tawh bawk. Vawk natna hi veng/khua 140 velah a leng hman a ni.