African Swine Fever chuan hun engemaw chen min chenchilh hnuah kian lam a pan a, tun hnaiah he hri hi a rawn darh chho lehin kumin thla thum chhung lekin vawk sang hnih dawn kan chan leh tawh a, a pawi hle, he hri leng hi eng angin nge kan do ang tih hi kan ngaihtuah a ngai tak zet a ni.

Hri leng a ziaawm chho a, sawrkar pawhin state pawn atanga vawk leh a sa te lakluh a phal a, chutihrual chuan hetianga lalut tur hian sawrkar atanga phalna neih a ngai a, a duh duh tan vawk leh a sa lakluh ngawt theih a ni lo. Chutihrualin phalna nei lova vawk lakluh a tam niin a lang a, ASF pawh a rawn hluar leh ta hle a ni. Nitin vawk thi hriattur a awm chho a, a bik takin khawchhak lamah a nasa zual niin a lang a, Myanmar lam atangin vawk hi a rukin kan lalut em ni awm tih theih khawpin khawchhak lamah he hri leng hi a hluar a ni.

ASF a darh chak hle hian a tih chian chu he hri hian min chenchilh hneh tawh hle tih a lang a, a vei lakluh a niha an han pung ta hluai hian hei ti a tichiang mai awm e. He hri darh zel tur hi engtiangin nge kan hmachhawn zel ang tih hi ngaih-tuah a ngai ta tak zet a ni.

Covid-19 vanga rei tak kan inkhuahkhirh hnua chhuah zalen kan nih khan a rawn darh leh ta huk kha a ni a, amaherawhchu Covid ah chuan vaccine a rawn chhuah tak avangin inven dan a awm, hri pawh a ziaawm chho ta zel a ni. ASF erawh chu tun thleng hian a venna a la chhuak hlei thei lo a, a vei te enkawl dan pawh a awm lem lo bawk. Chuvangin tun atanga chuan vawk kan lalut leh dawn a nih pawhin sawrkarin dan a siam ang kan zawm thlap a, khuahkhirhna hnuaia kan lakluh zel hi kan himna atana kan tih ngei ngei turin niin a lang ta a ni.