Aizawl; Tun hnaia vawk natna chi khat, African Swine Fever leng thar lehah Champhai district chhungah vawk 70 an thi tawh.

AH& Vety department thawktute hnen atanga ZALEN thudawn danin tunhnaia vawk hri lenna Ngur khua ah chuan ASF vang hian vawk 67 an thi tawh.

Heng bakah hian Champhaia veng pahnih Zion veng leh Vengthlangah vawk pakhat ve ve leh Kelkangah vawk pakhat an thi tawh a. ASF vei nia hriat vawk 13 tihhlum (culled) an ni tawh bawk.

ZALEN zawhna chhangin Vety department thawktute chuan Ngur leh a chhehvela vawk natna leng chu thenawm Myanmar atanga rawn lut ni lovin hriin Mizoram a chamchilh tawh, tun hnaia rawn inlar thar leh mai nia an hriat thu an sawi a. Mizoram thenawm, Myanmar lamah ASF vanga vawk thi an awm an hriat loh thu an sawi bawk.

Hetih lai hian Vety department thawk pakhat chuan district dangah ASF vanga vawk thi report hi awm lo mah se ASF vang hian vawk hi an la thi reng nia a hriat thu ZALEN a hrilh.

“Nikum lamahte kha chuan ASF vanga vawk thite hi zangnadawmna pek an ni a. Kuminah erawh chuan pek an nih tak loh avang hian vawk neitute hian an vawk hi thi mah se an rawn report lem lo a; chuvangin, fihlim ang hian kan lang mai niin ka hria,” tiin a sawi bawk.