ZALEN October 1, 2023 : AH&Vety department chhut danin Aizawl khawpui ringawtin thla khata vawksa a ei ral chu chawhrualin quintal 12,450 (kg 12,45,000) vel a tling a. Hetihlai hian Mizoram hmun hrang hrangah African Swine Fever (ASF) vanga thi vawk an la awm reng. 

Tun hnai kum 10 chhungin Mizoramah vawk natna hri a leng nasa hle a, kum 2013-ah PRRS a len avangin tam tak an thi a, hemi hnu kum 2016, 2018-ah PRRS vang bawkin vawk tam tak an thi leh bawk.

Kum 2021 leh 2022-ah vawk hri tho, African Swine Fever (ASF) vangin Mizoramah vawk tam tak an thi leh a. 1st wave (2021)-ah vawk 12,568 suat (ASF kai) an ni a, 2nd wave (2022)-ah 11,594 suat an ni a. 1st wave-ah vawk 33,417 an thi a, 2nd wave-ah 12,391 an thi leh a. Kumin 2023, 3rd wave-ah 980 thi leh tawhin vawk 590 suat a ni leh tawh bawk a. Hetihlai hian ASF hi ‘calamity’-ah pawm a ni lo.

AH&Vety chhut danin tun dinhmuna Aizawl khawpuiin thla khata vawksa a ei ral zat chu qntls. 12,450 vel a tling a. Vawksa  chauh ni lo, saa intodelh tur leh state pawn atanga a tlem thei ang ber la lut turin sawrkarin ruahmanna leh hmalakna a kalpui a, hmasawnna pawh a awm mek zel nia ngaih a ni.

# Kum 2021-ah vawk thi vanga sum hloh Rs. Vbc. 334.14, 2022-ah Rs. Vbc. 200.38 hmu let.

# Kum hnih chhunga sum hloh Rs. Vbc. 534.52 a tling a, kumin a sum hloh zat chhut fel a la ni lo. 

# Kum 2021-ah khaw 272 a nghawng a, nikumah 149 nghawngin kuminah khua 29 a nghawng mek.