ZALEN February 23, 2026: AH&Vety Minister C. Lalsawivunga chuan vawiin khan a office chamber-ah kum 2024 chhunga African Swine Fever (ASF) avanga vawk suatte zangnadawmna (ASF Culling Compensation) Rs.89,39,671.60/- chu beneficiary mi 10 hnenah a sem a, Mizoram puma ASF beneficiary-te hnena pek chhuah tur chu Cheng nuai 1,559.34 chu vawiin vek hian District khawpui tinah ASF Culling Compensation hi sem zui nghal tura ruahman a ni.

AH&Vety Minister C. Lalsawivunga chuan ASF Culling Compensation sawiin, “March 21, 2021-a Lungsen, Lunglei District-a ASF hmuh chhuah a nih atanga vawiin thlengin ram economy sawi nghing dawt khawpin ASF avangin kum tin vawk thi leh suat a awm thin a, sawrkar laipui thupek angin vawk suatte chauh hi Government of India rate leh norms angin compensation 50% CSS leh SMS hmanga pek theih a ni. Kum 2022-23 leh 2023-24 chhungin compensation atana kan sum mamawh 25% (CSS & SMS) chauh kan dawn avangin beneficiary-te hnenah 25% pek an ni a. Ran vulhtute hlohna a nasat avangin kum 2024 khan ASF chu Mizoram sorkarin State Disaster-ah puangin, Mizoram chauh hi India ramah State Specific Disaster-a puan kan ni. Hemi atan hian ran thi (suat tel lovin) ralna, ran thi pakhat zelah Rs. 4,000/- beneficiary pakhata vawk 6 (paruk) chin huamin Mizoram chhungah sem chhuah vek tawh a ni,” a ti.

AH&Vety Minister chuan, “ASF leng lo se Mizoram hi vawkah kan intodelh tawh dawn nia kan inngaih laiin kum 2021 leh a hnu lama ASF leng kha kan tuar em em a, kan ram economy pawh nasa takin a nghawng a, cheng vaibelchhe 960 vel zet kan hloh a ni. Chu vangin, vawiina vawk vulhtute ka ngen duh chu, vawksaa kan intodelh leh ngei theih nan leh kan ram economy chawi kang tura theih tawp chhuah turin ka ngen tak meuh a ni,” a ti bawk.

African Swine Fever(ASF) avanga vawk suatte zangnadawmna (ASF Culling Compensation) hi sawrkar laipui chuan rate bitukin, Kg 15 hnuai lamah Rs.2,200, Kg 15-40 inkarah Rs.5,800, Kg 70-100 inkarah Rs.12,000 niin, Kg 100 chin chung lamah Rs.15,000 a ni a. AH&Vety Minister Office Chamber-a zangnadawmna sem zinga dawng hnem ber Zabiakthara, Hunthar Veng, Aizawl chuan Rs. 36,12,166.60/- a dawng a ni.