ZALEN, Oct. 27, 2024: Asia khawmualpui ram 15 atanga ban elh chak fuan khawm zingah India aiawha inlan Mizo arm-wrestler pathumin gold medal pakhat telin medal pali an la.

India sumdawnna khawpui, Mumbai-a Inrinni kal ta atanga tun Inrinni thlenga 8th Asia Arm Wrestling Cup leh 7th Asia Para Arm Wrestling Cup neih zawh takah Mizo ban elh chakte hian gold pakhat bakah silver pahnih leh bronze pakhat an la a ni.

An zinga langsar ber chu Denic Lalruattluanga a ni a, 80kg Senior-ah gold a la a. Vanramnghaki’n medal pahnih a elh chhuak a, 80 kg Senior Left & Right-ah silver leh 80kg Para-ah bronze lain Benjamin Lalawmpuia’n 100kg Senior-ah silver medal a la bawk.

Mizo inlan zinga mi, Winkle Laltlanchhunga erawh 80kg Senior-ah inlanin medal a la phak lo hlauh thung.

India tana hlawhtlinna hlawh chhuaktu Mizo player-te hi Mizoram Armwrestling Association an chhuang hle a, ropui taka hmuah a tum a. “Mizo player-te hi an che tha satliah mai a ni lo va, Mizote arm wrestling-ah bung thar min kaipuitute an ni,” tiin an kal zelna turah duhsakna an hlan tih an sawi.

8th Asia Arm Wrestling Cup leh 7th Asia Para Arm Wrestling Cup hi People’s Armwrestling Federation of India (PAFI), World Armwrestling Federation (WAF) leh Asian Armwrestling Federation (AAF) tangho buatsaih niin Asia ram 15 atanga ban elh chak 800 chuang bakah Indian arm-wrestler 350 chuang an tel a ni.