AFC Asian Cup 2023 hun a hnai zel a, India pawh khawmualpui huap intihsiakna khel tura a inbuatsaih mek laiin coaching team tiphuisuia tichaktu a neih belh dawn.

Manchester City leh West Ham United winger hlui, Trevor Sinclair-a’n club-a a lo khelhpui tawh thin, Igor Stimac-a coaching staff a zawm dawn niin RevSportz chuan a tar lang.

National team head coach pawh hian Sinclair hi be fel tawhin All India Football Federation (AIFF) pawhin chhawr ngei tumin thu an titlu tawh nia tar lang a ni.

England international hlui, Kum 50 mi, Sinclair-a hi Lancaster City-ah khel chungin assistant manager a lo ni tawh thin a. Inkhelh a chawlhsan hnuah Bamber Bridge FC manager Jamie Milligan nen football academy an din zui bawk.

Stimac-a team-ah hian Sinclair-a hian set-piece leh khelmual sir (wing)-a khelh dan tur lamah a pui dawn nia sawi a ni.

Croatian coach Stimac-a leh Sinclair-a hi West Ham tan an lo khel dun tawh thin a. City tan bakah Premier League-ah hian Queens Park Rangers tan pawh a lo khel tawh bawk.

England tan pawh vawi 12 lai a khel phak a, Fifa World Cup 2002-ah khan Sven Goran Eriksson-a squad-ah khan a tel nghe nghe.

Hetih lai hian Indian team hian Inrinni hian inbuatsaihna hnuhnung nei turin Doha, Qatar an pan dawn a, a hma niin Sinclair-a hi a lo thleng dawn a ni.

Asian Cup hi Qatar hian January 12 atanga February 10 thleng a thleng dawn a. India hi Group B-ah awmin team tha tak tak - Australia, Uzbekistan leh Syria te a hmachhawn dawn.

Blue Tigers hian Australia chu January 13-ah hmachhawn hmasa berin January 18-ah Uzbekistan leh January 23-ah Syria te an hmachhawn zui leh ang.