Head coach Igor Stimac chuan 19th Asian Games-a India tana football-a inlan tur player 22 hming a puang a, an zingah hian Mizo pahnih, Lalchungnunga leh Lalengmawia Ralte (Apuia) te an tel.

Hangzhou, China-a September 19 leh October 7, 2023 chhunga neih tur games-ah hian India hi Group A-ah awmin China PR, Bangladesh leh Myanmar a awmpui.

Blue Tigers hi Asian Games-ah hian vawi hnih (1951, 1962) champion ni tawhin kum 1970 khan bronze medal a la phak bawk a; tun hnaiah hnuhma duhawm an nei phak ngai tawh lo.

East Bengal rinrawl Chungnunga
Aizawl FC atanga inzir chhuaka senior team tan pawha khel zui, Chungnunga hi season liam ta khan East Bengal-in tlarhnunga an rinrawl a ni a, India team-a Stimac-a’n a telh pawh hi a mak lo.

Kum 22 mi hian 2022-23 season-ah khan Indian Super League (ISL)-ah ringawt pawh vawi 19 lai a inlan a, cup chuhnaah pawh vawi ruk a inlan phak bawk a. Season tluanin Kolkata club tan vawi 25 lai a inlan phak a ni.

East Bengal-a a kal hma hian I-League-ah pawh Aizawl leh Sreenidi  Deccan tan sulhnu a lo nei nual tawh bawk.

ISL captain ni thei naupang ber
Apuia Ralte tia hriat lar, ISL-a Mumbai City midfielder ve thung hi Indian zinga ISL-a captain ni thei naupang ber lo ni tawh kha a ni a, NorthEast United tana a khelh laiin kum 20 leh ni 44 mi chauh a nih laiin kum 2021 khan captain banhren a lo hreng tawh a ni.

U14 Subroto Cup a khelhna atanga hriat hlawh daih tawh, kum 22 mi hi season liam ta khan ISL-ah vawi 17 inlanin goal thum a thun.

India tan pawh kum bithliah hrang hrang, Under 16, 17 leh 23-ah lo inlan tawhin senior team tan pawh vawi 11 a feh chhuak tawh a. Tun hnaia India-in Hero Intercontinental Cup leh SAFF Championship nomawi an lakah pawh khan Stimac-a team-ah a lo tel tawh a ni.

Stimac-a team
Goalkeepers: Gurpreet Singh Sandhu, Gurmeet Singh, Dheeraj Singh Moirangthem.

Defenders: Sandesh Jhingan, Anwar Ali, Narender Gahlot, Lalchungnunga, Akash Mishra, Roshan Singh, Ashish Rai.

Midfielders: Jeakson Singh Thounaojam, Suresh Singh Wangjam, Apuia Ralte, Amarjit Singh Kiyam, Rahul KP, Naorem Mahesh Singh.

Forwards: Siva Sakthi Narayanan, Rahim Ali, Sunil Chhetri, Aniket Jadhav, Vikram Partap Singh, Rohit Danu.

Asian Games football hi
Asian Games-ah hian Olympic Games ang thovin football bikah hian squad-ah kum 23 aia upa player pathum chauh telh phal an ni a. Kuminah hian Stimac-a chuan tawnhriat nei tha - Sandesh Jhingan, Gurpreet Singh Sandhu leh Sunil Chhetri te chu naupang ho khawm turin a ko.

Kum kua kal taa India-in games a khelh hnuhnung bera khel zingah Chhetri leh Jhingan chiah hi tun tum squad-a tel leh awm chhun an ni ang.

Ram 23 an inlan dawn a, hengte hi group rukah then niin Group A, B, C, E leh F-ah team li theuh leh Group D-ah pathum an awm.

Group khata awm turte pawh a nih hnuah khan coach Stimac chuan, “India-a keini tan chuan a puiin a phurawm tak zet. Tunah chuan 19th Asian Games leh World Cup Qualifiers Group A-a kan hmachhawn turte kan hre ta a, tun hnaiah heng team lakah hian hlawhtlinna kan lo chang tawh hlawm,” a ti.

“Hetih rual hian fimkhur taka kan  inruahman a ngai a. Kan ram team tana a tha thei ang bera inlan turin kan tih theih apiang kan ti ang,” a ti.

“Asian Games-ah a thlengtu, China kan hmachhawn dawn a, naupang tha tak tak kan nei a, hlawhtling takin he group hi kan kalpel ngei ang,” a ti bawk.