China-a Asian Games 2022 kal mek zelah India chuan medal 95 a la tawh a, medal 100 a la tling ngei dawn tih pawh a chiang tawh.

Zirtawpni zan thleng khan Indian infiam mite chuan gold 22, silver 34 leh bronze 39 an la tawh a. Hangzhou khawpuia inelna kal mekah hian India hi infiamna hrang hrangah medal a lak belh dawn tih chianna a awm sa nual a, a vawi khat nan khawmualpui huap intihsiaknaah hian number pathum (three-figure) a kai ngei dawn tih a chiang tawh.

Zirtawpni tlai khan India rama infiamna ngaihhlut hlawh ber pakhat, hockey-ah mipate chuan final-ah Japan chu 5-1 zeta sawpin a vawi li nan Asian Games-ah an champion.

Harmanpreet Singh-a leh a hote hi an champion avang hian Paris 2024 Olympics Games-ah an inlan phak dawn tih a chiang ta bawk.

India hi 1966, 1998, 2014 leh 2023-ah gold medal an la ta a. Kumin final-a an hneh hi 2018 Asian Games gold medallist kha an ni.

Zirtawpni vek khan recurve archer-te pawhin kum 13 hnua a vawi khat nan Asian Games-ah medal an kap chhuak veleh ta a. Men’s team-in silver an lak laiin women’s team-in bronze an hum haw ve thung.

India rama infiamna ngaihhlut hlawh bera chhal ngam, cricket-ah mipate chuan semifinal-ah Bangladesh hnehin final an lut a. Asian Games-a an vawi khat inlannaah a chhe berah silver medal tal an awrh haw dawn tih a chiang.

Semifinal lehlamah Pakistan leh Afghanistan an inhmachhawn dawn a, a India hian a chak zawk zawk final-ah a su ang.

Hangzhou-a intihsiakna kal mekah hian India hian kabaddi-ah hmeichhia leh mipaah final an lut ve ve bawk a. Zirtawpnia semifinal khelhah men’s team hian hmelma kumhlun, Pakistan hnehin women’s team-in Nepal an hneh ve thung.

Badminton-ah HS Prannoy chuan men’s singles-ah bronze a vaw chhuak a. Satwiksairaj Rankireddy leh Chirag Shetty te tangdun chuan World No. 5 Aaron Chia leh Soh Wooi Yik (Malaysia) te chu semi-final-ah hnehin men’s doubles-ah gold medal inchuhna inkhel an la hmabak a, silver tal an hawn dawn tih a chiang.

Sepaktakraw-ah women’s regu team chuan bronze an la a, India-in sepaktakraw-a medal a lak pahnihna niin hmeichhe huanga inelnaah phei chuan a vawi khatna chauh a la ni.

India hian men’s bridge team event-ah silver medal a la bawk a, 2018 Asian Games khan bronze lain hma an sawn hret a. Chess-ah pawh men’s leh women’s chess team event-ah round khat khelh la hmabak a awm a, silver medal la thei dinhmunah an ding mek ve ve.

Chanchin lawmawm a awm mek laiin wrestler Bajrang Punia chuan Asian Games title a kawl chu Hangzhou-ah a hum zo lo va. Tokyo 2020 Olympic Games bronze medallist kum 29 mi, Punia hian men’s freestyle 65kg semifinal-ah world champion grappler Rahman Amouzad a hneh lo a ni.

Wrestling-ah hian Sonam Malik, Kiran Bishnoi leh Aman Sehrawat ten bronze an la theuh thung a, wrestling team-in medal panga an la tawh a ni.