Indian infiam mite chuan Asian Games neih tawh zawng zawnga an chet that ber tum tawngin medal a lak hnem ber tum a khum ta.

Khawmualpui huap infiamna inkhawmpui lianah hian tum khata India-in medal a lak hnem ber tumin 70 a la a. Nilainitukah khan thal kah thiam pahnih, Ojas Pravin leh Jyothi Surekha te inkawp chuan mixed team compound final-ah South Korean tang dun hnehin gold medal an la a, India tan record thar an siam ta.

India hian 2018 Games-ah khan gold 16, silver 23 leh bronze medal 31 lain hemi tum hi medal a lak tam ber tum a ni a. Hangzhou 2022-ah hian Indian infiam mite hian Nilaini tuk thlengin gold 16, silver 26 leh bronze medal 29 la tawhin a lak tam ber tum a khum ta a, medal dang lak belh beiseina lian tak tak a la nei bawk.

Asian Games-ah hian infiamna hrang hrang zingah silai kah leh thal kah chu India-in medal a lak tamna ber a ni a. Kuminah hian silai kahah medal 22 la tawhin athletics-ah 23 a la tawh bawk.

Indian race walker pahnih, Manju Rani leh Ram Baboo te chuan 35km mixed race walk-ah Nilaini tuk khan bronze medal lain India hian 2018 Jakarta Games-a a medal lak zat a nihrual.

A hnu lawkah compound archer pahnih, Deotale leh Surekha Vennam te chuan India tana medal 71-na chu mixed team-ah an la zui leh ta a ni.

India chef de mission Bhupender Singh Bajwa chuan, “India-in Asian Games-a medal a lak tam ber tum a thleng hi a nuam tak zet a, a dang pawh a lo la kal zel dawn bawk a ni,” tiin hlim takin a sawi.

Kumin intihsiakna hi India-in khawmualpui huap inkhawmpuia infiam mi a tirh tam ber tum a ni bawk a, medal 100 tal lak tlin a tum hle.

Hangzhou Games-a India au hla (catch line) pawh ‘Aab ki Baar, Sau Paar’ (kuminah medal 100 lak) tlh chu nasa takin a aupui bawk.

Nilaini tuk thlengin India hian gold 16, silver 26 leh bronze medal 29 la tawhin ni li intihsiakna la kalpui turah palina dinhmun a hauh mek a ni.