Ramri buai chungchangah hapta khat chung lekin thil a thleng hnem hman hle a ni. Lailapur, Medili lui ral lehlam leh Bairabi-a lirthei lut turte chu dan an ni hlawm a. Tunhnaiah Assam lam forest officer pakhat chuan Saihapui V a tlawh a, ADGP pakhatin ramri tlawh lehin Mizoram IR te chu darkar 24 chhunga an inhnuk dawk a nih loh chuan inkahna thlen tur thu a sawi bawk a. Chief Secretary chuan Home Secretary hnenah sipai te chu mipui him nan lakchhuah tum a nih loh thu a sawi a, Mizoram lama lirthei dan te chu inbiakremna angin chhuah an ni tawh a, Zirtawp zan maiah Mizoram motor te Assam police vennaa chhuah tum nia sawi a nih laiin Lailapur atangin let tir an ni leh a, ngaihzam chi a ni tawh lo a ni.

Ramri hmun thenkhata dan loa pem rua awmte buaina chawhchhuah vang maia tun buai hi thleng nia ngaih tur nise, Assam officer leh police lawk te hi a pawr zawngin an inrawlh sek a rinawm loh a, tawngkam pau tak tak an hnutchhiah a rinawm loh. Assam nena ramri buaina a awmin Mizoram lam hi a chan chhe zawkah a tang fo a, a ramri tak erawh chinfel theih a ni ngai lo.

Tun tum an chet danah hian Assam hian Mizote a tham lo ta hle a, tunhnai mai atang khan ramri buaina hi an rawn siam thar leh a ni. Assam hian tum a nei a, an state inthlan hmachhawn nan ramri humhalh boruak a siam ni ta berin a lang a ni. Hemi boruak hi kan tuar tak tak a nih chuan a tlawm thlak hle a, ngaih thutak viau tur pawh a ni ang.

A tira buaina a han sosan phat khan State pahnih CM an inbia tih kan hriaa mipui thla a muang hman viau a nih kha. Tuna bungraw phur indan bik hi chu BJP in a din North East Democratic Alliance (NEDA) tuna kan sawrkar telnaah hian political pressure hmanga chinfel theih a beiseiawm a. Kan CM pawhin ramri buaina tihfel dan thuhruk a hriat thu a sawi tawh a, tun buaina pawh hi a chinfel theih mai a beisei awm a. A nih loh chuan Assam inthlan zawh hma chu Mizoram hi kan lo buai ve zel ang tihte pawh a hlauhawm e.

Tun tum ramri buainaah hian Mizo mipui tlawm an tum lo hle niin a lang a, an ning tawh takzet tih a hriat a ni. Tun bungraw indan sak buaina hian reh hun a nei chek anga, chumi hnuah chuan ramri buaina hi chingfel tak tak turin sawrkar hian hma a lak ngam a hun tawh viau e.