Aizawl; Vairengte Aitlang hnar lam, Assam ramri hnaiha Vairengte mi, hmunphiah huan nei chhungkaw 20-ten Assam Police (AP)-te lakah harsatna tawk loin an hmunphiahte an seng zo thawkhat tawh.

Aitlang hnar lama hmunphiah huan nei thenkhatte hnen atanga ZALEN thudawn danin, tun thla tir chho atang khan AP-te lak atanga harsatna engmah tawk loin an hmunphiahte an seng a, tun dinhmunah chuan Aitlang hnar lam, Assam ramri hnaiha hmunphiah huan nei, AP-ten an hmunphiahte seng mai bakah, an huanah pawh kal phal loa an lo tihbuai thinte chuan an hmunphiahte an seng zo thawkhat tawh a ni.

Kuminah ruahtui a tlem deuh avangin kum dang erawh an pha lo deuhah an inngai a, an hmunphiah tharte chu an huan tlangah Mizo kharchhawngten kalchilhin an hralh nghal a, a rate erawh a tlahniam a, tun dinhmunah kg-ah Rs. 40 bawr velin an hralh a, a tlangpuiin quintal 40 atanga quintal 90 bawr vel an thar hlawm.
 
Tar lan tawh angin, Aitlang hnar lama hmunphiah huan nei mi thenkhatte chu AP-ten kumin January 13 khan an huana kal an phalsak lo a, kuminah chuan an hmunphiahte lak phalsak an nih dawn loh thu an lo hrilh.

Hemi hnu hian inbiak a ni a, huana kal turten AP-te laka harsatna an tawh lohna turin ID card pawh siamsak an lo ni tawh a, chung ID card chu AP-ten ram neitu an ni ngei tih an hriatna tur leh an lo dan lohna tur atana tih a ni.

Hetihlai hian ID card hman ngai loin an huanah hna thawkin, hmunphiahte an la thei tih huan neitute chuan ZALEN an hrilh a, ramria police duty-te azirin harsatna an tawk thin niah an ngai.