Aizawl October 7, 2024 : Vawiin thawhtannia ZPM Party chhung inkhawmah Lalmuanpuia Punte, Adviser to Chief Minister chuan tunlaia Assam Rifle Kohhran ram chungchanga amah beihna chu thu belh chian dawllo a nih thu a sawi.

Lalmuanpuia Punte chuan, “Assam Rifle Kohhran ram chungchanga thu belhchian dawllo hmanga min puhtu Pu Ramkinmlova hi ka mi hriat chian tak a ni a, chuvangin a thusawi hi ka lo ngai thu tak lem lo a, tunhma deuh atang khan mi hi a rawn be fo a, nikum lam khan ZPM Sorkar a rinthu sawiin min rawn be nasa zual a, hman lo deuh chung pawhin ka lo be hram hram thin a ni. Amah hi MLA inthlanahte pawh BJP leh JDU ticket te pawhin a lo ding ve tawh thin a, min rawn biak fo takah chuan ti ti phunglengah Assam Rifle-te hi chhuak ta se an Mandir leh Kohhran ramte hi engtia awm zui tur chi nge maw a nih le tiin ka zawt a, a ni chuan Synod ram a nih thu min hrilha, keipawhin a nih tak chu mawle ti ka chhang ve mai a, chu bak chu hetiang lam hawi kan sawi lo hrim hrim a ni."

“Biak In chungchang min rawn zawt sek," a tih hi chu thu dik lo a ni a, min puhna chungchangah hian phone call hmanga han biak ka tum a, nimahsela biak tlang theih lovin a awm ta tlat mai a, midang hnen atanga a biak theihna zawtin ka va be pawp ta a, Governor-in a be duh che ti anga sawia min puh ni hi engtik ni nge? tiin ka zawt a, ani chuan Ni 7 thla 9 tiin min chhang a ni. He mi ni a sawiah hian governor chu damlohna avangin Damdawi In ah a lut a, hetiang hunah hian Governor nen kan awmdun lova, Kohhran Upa in hetianga dawt a sawi ta mai hi mak ka ti khawp mai a, hetiangin Governor-in mi an be ngai lo tih hi kan hre theuh awm e. Governor chu, Mizopa ho thukhawm ang a, “Kha, hei hian a be duh che,' tih mai mai chi an ni ve lo. Tun hma chuan pawl angtein Governor han hmuhte chu kan nei ve a, mahse vawiin thleng hian mimal-in Governor hi biain ka la hmu ngai lo hrim hrim a ni,” a ti.

Muanpuia chuan,"He inpuhna hi tuten emaw ruahmanna niin ka hria a, ZPM hian party office kan la nei lo bawk nen Assam Rifle chhuak mai tura ngaihah an Biak In Party Office-a neih tum anga puhna a ni a, Party intihhming chhiat tumna a ni a, Pu Lalthanzara, MPCC President pawhin an Party office-ah thawi deuhin a sawi niin ka lo hria a, mak ka ti hle a ni. ZPM Party bakah keima mimal politics zinkawng tihchhiat tumnaah ka ngai,"

"Ka bial Hrangturzo hi Mizoramah chuan Presbyterian bukna hmunpui ber a ni hialin ka ring a, khi lai biala min tihchhiat tuma leh phur taka min beihnaah ka ngai lo thei lo a, ruahmanna siamtu pawh mi tam an nih ka ring lo. Tu party mahin an sawrkar laiin eng Kohhran Biak In mah hi neihsak tuma hmalakna an kalpui ngam ka ring lova, ZPM phei chuan Presbyterian Kohhran Upa Chief Minister-a nei, Party president-ah pawh Presbyterian Kohhran Upa nei kan ni a, chuvangin min puhna ang hi thil tih ngam chi pawh niin ka hre lo. Min puhna hi ngaihzam har ka ti a, dawt a nih zia mipui hriataa pholan a nih zel theih nan dan hnuaiah a tul ang zela umzui ka tum a ni,” a ti bawk.