ZALEN Oct 7, 2025 : Mizoram sawrkar a General Administration Department (GAD) chuan, Mizoram Presbyterian Church, Synod hnenah Assam Rifles biak in hmun ram chu Assam Rifles in Mizoram hnena MoU ziaka an hlan chhawn zinga a mi a nih thu ziakin an hrilh.

Principal Secretary, GAD in Senior Executive Secretary, Mizoram Presbyterian Church, Synod hnena tunhnaia ziaka lehkha a pekah he thu hi tarlan niin, chu lehkha a tarlan a nih dan chuan, Assam Rifles biak in hmun ram chungchang chu Advisory Committee meeting, ni 24.7.2025 a neih chuan ngun takin a ngaihtuah a, he biak in hmun ram hi Assam Rifles in Mizoram sawrkar hnenah MoU ziaka a hlan chhawn zinga a mi a ni a, Assam Gazette Notification date 8.8.1962 chuan Assam Rifles ram chhungah a rin lut a, tin, chumi hnuah The Mizoram (Restriction on use of Transferred Land) Act, 2002 chuan Assam Rifles ram chhungah a rin lut leh bawk a ni.

Chutih mek laia kum 2011 a land lease (Land lease No. DLL MISC 128 of 2011) siam a nih chu a felhlel deuh niin Advisory Committee chuan a hria a, tin, Central YMA in High Court a PIL a thehluh WP (C) No. 31 of 2020 ah biak in hmun hi a tel bawk a. Tun dinhmunah helai ram chungchang hi High Court in a ngaihtuah mek a ni. Chuvang chuan High Court thu chhuak a awm hma chuan tu tan mah he biak in hmun ram neitu nihna hi chhal (claim) theih niin a lang lo a ni tih ka rawn hriattir a che, tiin tarlan a ni.

#ZalenNews