ZALEN October 17, 2023 : Vawiin khan National Highway 54, Zokhawsanga hnuai kawngpui, Zemabawk leh Tuirial inkarah Power Minister F. Rodingliana motor chu Assam Rifles ten check an tum a, minister hi a lungawi lo hle niin thu dawn a ni a, Chief Minister-in a ngen hnuah Check gate hi a chhuahsan.

F. Rodingliana hian nimin khan Champhai District chhunga a department enkawl Power & Electricity leh Commerce & Industries hnuaia hmunhma thenkhat a tlawh a. Thawhlehni khan Vankal Solar Park tlawhin kawlphetha tam zawk tharchhuah dan tur a enpui, tukin khan Champhai atanga rawn haw in he dinhmun duhawm lo tak hi a thleng ta a ni.

Thu dawn danin nimina Tuirial kawnga Assam Rifles Duty te hian Barricade baka lirthei rah atana pawi thei hmarua an thawhchhuahpui a, Minister-in a paltlang dawn hian heng hmarua te hi an lo hmang a, mi an rawn punkhawm hnuah an hmarua te hi chu an saseng a, mahse, minister hian checking an neih chhan a hriat hma chu kaltlang a tum loh thu a sawi hnuah Chief Minister ngenna angin CM Bungalow a pan zui ta a ni.

Power Minister hi a bial a fanna Kawlbem lamah pawh tunhnai khan Assam Rifles lam hian check tumin an lo tiding tawh a, hemi tum pawh hian boruak chu an lo nei hat hman a, hemi tuma an haw leh lam hi AR lam hian lo tihdin leh an tum a, mahse, hemi tum hi chuan an tlantlang niin thu dawn a ni.