Nimin maia Chapchar kut hmanna pui ber Lammual a neihah Chief Minister Zoramthanga chuan Assam Rifles te chu June 2019 ah chuan Zokhawsang lamah an insawn tawh tur thu sawiin tuna AR luah ramah chuan stadium lian tawk sak anih tur thu a sawi a. Chief Minister thusawi hi a lawmawm em em rualin tuna AR te awmdan en hi chuan June thla ah chuan an chhuak maiin a la rin-awm chiah lo a, engpawhnise an chhuah dawn avang hian Mizo mipuite tan chuan a lawmawm hle a ni.
Assam Rifles insawn tur chungchangah hian Land Revenue & Settlement Minister Lalruatkima chuan Thawhtanni kalta khan Hnam Run-ah thu sawiin, "Assam Rifles insawn chhuak tura tihna hi ni 13.10.2007 khan tihfel tawh a lo ni a, hmalatu ber MNF sawrkar a tlak tak avang khan tumah bawhzuitu an awm ta lova, sum pawh cheng vaibelchhe 117 zet sanction a lo ni tawh nghe nghe a ni. Khatih lai atang tawh khan Assam Rifles hmun hi mimal ram atana sem hlauhthawnna mipuiah a lo awm tawh a, chumi hma daihin MNF Ministry khan hmathlir thui tak lo neiin a venna tur dan 'Restriction of Tranfer of Land' dan a lo siam fel dim diam tawh a, mimalah ram pek a ni dawn lova, sorkar ramah dah vek a ni dawn a ni," a ti a. Revenue Minister thusawi atang hi chuan a ngaihthatthlak hle a tih theih rualin mipuite rilru ah hlauh a la awm cheu mai.
Mi thil chikmi te sawi danin tuna Assam Rifles luah ramah hian LSC nei mi 50 vel an awm niin an sawi a, heng mite hian AR te lak atang chuan phalna/remtihna 'no objection certificate' an neih a rinawm loha, mahse heti a ni chunga mi heti zat LSC nei an awm thei hi thil mak tak a ni a. Dan ang chuan miin LSC a neih dawn chuan a thenawmte remtihna a ngai a, chubakah Revenue thawktute Surveyor ten an teh thin bawk. Hetia AR te ven tlat a ni chunga mi heti zatin LSC an nei thei anih chuan sawrkar/mipui kutah hian lut ta se helai hmun tha lutuk mai hi mi thiltithei ten an insem zo mai ang tih hi mipui hlauh a la ni reng a ni.
Tuna sawrkar thar hian mipui fak a hlawh a, hmasawnna hna pawh thawh an tum hle ni pawhin a lang. Assam Rifles sawnchhuah chungchangah pawh hian a bultumtu an ni a, MNF sawrkar hmasaah khan thui tak hmalak a ni tawh a. Sawrkar kalta kha chuan a chhunzawm awm hriat a ni lo a, MNF sawrkar a lo din leh takah chuan hmalakna hmasaah neiin a hlawhtlinna pawh kan hmu dawn hnai niin a lang. MNF te hi hma latu an nih ang ngeiin AR sawn hi champion pui ngei tum se, chutih rual chuan AR ram mimal thiltithei ten an insemral mai mai lohnan khauh takin hma la chhunzawm zel se. Assam Rifles chhuahsan tur ram hi mipui vantlang tan tangkai taka an hman theih phawt chuan MNF sawrkar hi mipuiin an fak kumkhua tawhin a rinawm.