ZALEN October 18, 2024 : Mizo Zirlai Pawl General Headquaters Extended OB Meeting, ni October 18, 2024 (Zirtawpni) a thukhawm chuan, Minister of State F. Rodingliana Lengteng Bialtu ni bawk zin haw lam, Assam Rifles ten an lo dan buai chungchang a ngaihtuah a. Meeting hi President H. Lalthianghlima chua a kaihruai a, a hnuai a mi ang hian thutlukna an siam.

1. Lengteng Constituency Bialtu MLA Pu F. Rodingliana bial fang zin haw lam, 2nd Battalion Assam Rifles duty ten an thuneihna piah lama darkar 2 chuang lai mai an lo tiding leh a hnua harsatna siam zawnga an che hi MZP chuan a hrethiam lo a. A dem takzet a ni. Mizoram ram ralmuang taka Assam Rifles te chetna chhui chianga, a tul anga hmala turin MZP chuan Mizoram Sawrkar a ngen nghal bawk.

2. Armed Forces Special Power Act 1958 (AFSPA) hmanna state pawh nilo, Mizoram chhunga Assam Rifles te’n Minister zahawm tak Pu F. Rodingliana an lo dang ngawt mai hi MZP chuan enliam mai mai harsa a ti a. Thuneihna hman sualna awm ngeiin a hria a ni. Democracy hnuaia Mizoram mipui ten kan aiawh tura kan thlan chhuahte zah lohnaah MZP chuan Assam Rifles te chet dan hi a ngai a, hetiang thil thlen nawn MZP chuan a remti dawn lo a ni.

3. Mizoram Minister dang tura thu petu leh harsatna bultumtu, a kaikuang hi chhui chhuak a, Mizo mipuite leh Assam Rifles-te inkara inhriatthiam lohna thlentu hi a rang lama sawn chhuak vat turin MZP chuan thuneitute a ngen nghal bawk.

4. Indo-Myanmar ramria awm kan nih avangin, Mizoramah Para Military & Central Forces-te an la awm reng dawn a. Mizo mipuite nen thawhhona tha tak awm zel se tih hi MZP duh dan a ni a. Ram himna ti derthawng leh dan kalha chete dodalna nilo, mipuite tana hnawk sak zawnga hmalakna leh Aizawl laili atanga Zokhawsanga an insawn hreh vanga buaina siam tumna a ni em tih MZP chuan a vil zui zel dawn a ni.

5. MZP chuan mipuite thlan chhuah, ram hruaitu pawimawh tak; Assam Rifles te'n harsatna an siamsak hi Mizo Hnam hmutsitnaah a ngai a. Tribal hnamte engahmah ngaih lohna a nih avangin, hetiang a thlen nawn tawh loh nan MZP chuan Union Home Ministry-ah he thil thlêng hi a thlen dawn a ni.