Aizawl: Assam Rifles te chuan kumin kum tir atanga December ni 25,2023 inkar chhung khan ruihhlo vaibelchhe 956.65 hu an man.

Kum tir atanga December ni 25,2023 inkar chhung khan Assam Rifles te hian chetchhuahna (operation) tum 248 neiin heroin 33.20 kg, opium 03 kg, poppy seed 20.540 kg, ganja (marijuana) 25.950 kg leh meth amphetamine mum 12,17,524 te an man a.

Heng an thil man hlut zawng hi vaibelchhe 956.65 hu a tling a ni. Kumin chhung vek hian Assam Rifles te hian kuhva ro 681.03 qtls, ramdang siam sikret 4134 case leh zu 2953 case te an man bawk a. Heng an thil man hlut zawng hi vaibelchhe 96.07 hu nia chhut a ni bawk.

Hei bakah hian Assam Rifles te hian Civic Action Programme hnuaiah national integration tour, infiamna hmanraw sem, thalaite tana hnathawh, ramri bul hnaia chengte hmasawnna atana thawh leh hmeichhiate dinhmun chawinana atan hna engemaw zat an thawk bawk a. Civic Action Programme hnuaia an sum sen hi nuai 33.30 a tling a ni.