Aizawl March 11, 2023 : Assam Rifles Serchhip Battalion leh MJA Serchhip District te tangkawp chuan vawiin khan Mizo thalai Sipai a inziaklut duh te tan Assam Rifles Serchhip hmunah inhrilhhriatna hun leh Online a Registration tihna hun leh Pre-Medical test Programme an buatsaih a, Thawhtanni-ah chhunzawm a ni dawn.

Assam Rifles Serchhip Batallion leh MJA Serchhip District ten February ni 21 a inkawmhona an neih atanga ruahmanna an siam angin Mizo thalai Sipai a tang duh te tan he hun hi an buatsaih a, Online a Application form thehluh chungchang te bakah, sipai tan tum thalai te kawng hrang hrang a tahhriam an nih theih nan a hmalakna bul tan nan vawiin khan 42nd Assam Rifles hmunah Assam Rifles bakah Indian Army a tang duh te tan Online a Registration tihna hun leh Pre-medical test Programme neih a ni a, mi 5-in registration an ti thei a, Adhaar Card leh Phone number thlunzawmloh avangin thalai thenkhat in an ti theilo a ni.

Online-a Registration tihna hun hi March ni 13 Thawhtanni ah chawhma dar 10:00 atangin chhunzawm leh tur a ni a, Serchhip Press Club leh Assam Rifles Camp-ah te tih theih a ni a, Sipai tang duh te chu he hun hi hmang tangkai turin MJA Serchhip District leh Assam Rifles te chuan an sawm a ni.

May ni 1-a Assam Rifles lakna neih leh turah hian Mizoram biakah Post 21 atangin hna ruak 88 lak tur a awm a, qualification hi a hniam berah class X atanga intan a ni a, post leh qualification hrechiang duh chuan MJA Serchhip District member te hnenah zawhfiah theih a ni. Assam Rifles-a intlar tum te tan Tribal Certificate, Residential Certificate, Educational Qualification lanna Certificate, Aadhaar Card (Phone number nena thlunzawm sa), Passport Size photo leh Email Address inrin tur a ni.

He hunah hian Assam Rifles bakah Indian Army-a luh tum te tan pawh Registration tih nghal theih a ni bawk a. MJA Serchhip District Memberte chuan vawiin khan he hun hi a hmunah kalchilhin, Assam Rifles Unit Hospital-a RMO nen inkawmna an nei a, Medical lam zirlai te tana Sipai tan hlawkna leh a kalkawng te sawiho a ni a, Inkawmhona ah hian Medical lam zir chhuak Sipai a tang duhte tan hmalak a tanho dan ngaihtuah nise an ti.