ZALEN Aizawl 6, 2025 : Vawin chawhnu hian Joint Civil Society of Mizoram (JCM) buatsaihin Forest Conservation Amendment Act, 2023 (FCAA, 2023) Mizoram Legislative Assembly August ni 27, 2025 thukhawm in a nih ang anga Mizorama hman theih tura an lo pawm (adopt) chu tha an tih loh leh pawmpui theih ni lova an hriat avangin, hemi chungchanga inrawnkhawmna a buatsaih a. 

Hetah hian heng NGO, Political Party leh Pawl hrang hrang an sawm zingah a hnuaia pawl aiawhte hi an rawn tel a ni: Central YMA, MHIP Hqrs, MPCC, MNF, PC, Mizoram Transformation Movement (MTM), CESJ, Mizoram First, CATAJ, ZORO, Mizoram Environment NGO (12 environment NGO) 

He inhmuhkhawmna ah hian FCAA-2023 Mizoram Legislative Assembly in a lo pawm tak chu ram leh hnam, thlahte leh chhuan lokal zel turte tana thil himlo, thalo leh pawi tak mai, chhiat hlenna hial thlen thei niin an hria a. FCAA-2023 chungchang chu sawi hovin, hetiang hian thutlukna kan siam.

1. FCAA 2023 hi anih ang ang a pawm hi tha kan ti lova, Mizoram Legislative Assembly Session August ni 27, 2025 thukhawm in a lo pawm (Adopt) chu sut leh ni sela, a tul angin Assembly Special Session pawh ko ngei rawh se, kan ti.

2. Mizoram Legislative Assembly August ni 27, 2025 thukhawm in FCAA, 2023-a lo pawm (Adopt) tawh chu sut anih leh theihna turin hmalakna tur hrang hrang hetiang hian duan a ni.

i) Citizen's Rally /Kawng zawh/ Band/ Huaihawt nise kan ti. 

ii) Online leh Off-line Signature Campaign buatsaih.

iii) A tul anga Mizo mipuite hrilhfiah a Mizoram khaw hrang hranga vantlang inkhawm neih.

3. Heng thutluknate hi a hlawhtlin ngei theihna turin chak taka hmalak zel anih theihnan JCM hmalakna hi kan thlawp a ni.