June ni 12 atanga neih tan Mizoram Legislative Assembly Budget Session chu tluang takin zawh a ni ta a, tun tum session-ah hian thil danglam leh hriat nuam lo tak pakhat MLA hlui mi 4 lai mai Goa Chief Minister Manohar Parikar, Mizoram Assembly Speaker hlui R.Lalawia, Ex-Minister pahnih, Lalrinchhana leh PB Rosanga te sun an ni tih loh chu a lawmawm lam zawngin thil a kaltluang thei a.
  Speaker pawhin boruak tha tak leh hlim taka hman a ni te, member ten tawngkam hriam ngaihthlak nuam lo tak sawi chhuak an awm lote chu lawm-awm a tih thu a sawi a, Memberte inpekna chuan rah tha a chhuah a beisei thu a sawi bawk a ni.

Mizoram MLA ten an ngaimawh, an veizawng leh ti tura an duh an sawichhuah te hi ngaih pawimawh ni zel thei se a duhawm hle. Kan MLA te hi bial mipuite thlan leh an aiawh an ni a, House-a an thusawi te hian ngaih pawimawh a hlawh tawk lo em aw tih rum rum chang a awm thin. MLA te thusawi bawhzui a, a tak taka chhuizuitu tur chu sawrkar hnathawk te hi an ni. Eptu MLA an nih avanga bawhzui tha duh lo te an awm anih chuan an tih tur an ti lova, sawrkar hna thawk zui tlak zel pawh an ni tihna hial a ni thei ang.

Mizoram Legislative Assembly session hi state dangte tih lemloh angin an rorel lai hi live telecast a pekchhuah anih avangin mipui ten mahni awmhmun atangin kan lo thlir thei a. Kan MLA te chevel leh khawsak dan pawh chiang takin a hriattheih vek bawk a. tunhma atang tawhin state danga session te ngaihtuah chuan rorelna pawh a kaltluangin MLA te pawhin inkhawm kaihruaitu an zahthiam thin hi thil entawn tlak tak a ni. Bill sawihona bakah zawhna leh chhanna hunah pawh an khawsak dan hi a hmuhnawm hle a ni.

Parliament session te kan thlir thin a, inauhbuai avang leh mahni duh dan tih puitlin tum tlat avangin rorel thei lovin an awm zing hle a. A chang phei chuan ni engemaw zat rorel thei lova awmin inauhbuai vangin Lok Sabha lamah Speaker leh Rajya Sabha lamah Chairman ten rorel inkhawm an titawp zing hle a, bill pawimawh leh rorel tur pawimawh tak tak te sawiho theih anih thin loh avangin sum tam tak a kalral thin a ni. Hei hi a chhan ber chu eptu lamin an thu putluh te ngaihtuah leh sawiho pui tura an kar tlat avang te, roreltu lamin an duhloh vang te a ni a, inbiakna hmanga chinfel tum pawhin harsatna an tawk nasa thei hle anih hi.

Mizoramah erawh chuan hetianga inauhbuai ang chi hi a thleng ve lemlo a. Tawngkam chungchangah pawh eptu leh rorel lam te inzahtawn takin an in chhang thin te hi an entawn tlak hle a ni. Parliament leh state Assembly thenkhatah chuan an tawngkam hman te a dengkhawngin sawichhuah leh zahthlak khawp te pawh a awm nual thin a, hemi kawnga kan ram roreltute tawngkam leh chetzia erawh hmuh a nuam hle. Hei mai bakah MLA ten an hlawh atanga 1% health care atan dahhran an remti te hi an entawn tlak hle a, hmahruaitu ah tang zel thei se a duhawm hle mai. Kan Zonun zemawi hi kan ram hruaitute hian kan ram rorelna sang berah hian lantir chhunzawm zel thei se a duhawm hle.