ZALEN May 16, 2026: Hmar Martarte Ni vawi 36-na chu vawiin khan Manipur-a Churachandpur Saikawt Playground-ah hman a ni a, Mizoram Assembly Speaker Lalbiakzama chuan khuallian niin a hmanpui a, he hunah hian Hmar Martyr's Trophy vawi 19 na khelh a ni bawk. 

Speaker chuan Hmar Martarte inhlanna chu hnam rohlu leh hriatreng tlak a ni a, Martarte thisen hian hnam nunna, zahawmna leh inpumkhatna a siam a, ti. Ram leh hnam humhalhna atan an nunna hlantu Martarte chu chawimawina chibai a buk a. Martarte inhlanna chu thuin sawi kim theih a ni lo va, an thisen leh an inhlanna hian hnam nunna, zahawmna leh inpumkhatna lungphum a siam tih a sawi. Martarte chu hriatrengna mai an ni lova, hnam ro hlu an ni a, an inhlanna hian thangtharte thinlungah huaisenna, inpumkhatna leh ram hmangaihna a tuh zel tih a sawi bawk.

Speaker chuan Hmar hnam leh Mizo identity inzawmna pawimawhna a sawi chhuak a, Hmar hruaitute leh organization ten Mizo/Zo inpumkhatna an ngai pawimawh chu lawmawm a ti a. Manipur-a Hmar organization ten Mizo/Zo identity reaffirmation an tih chu Zo hnahthlakte inpumkhatna leh hnam nunphung humhalhna kawngah pawimawh tak a ni tih a sawi.

Manipur-a chi leh chi buaina chungchangah Speaker chuan Zofa unau ten harsatna leh tawrhna nasa tak an tuar mek chu a lungngaihthlak a tih thu a sawi a, Zofa/Mizo zawng zawngte inpumkhatna leh inunauna vawng nung zel tura ngenin, tawng hrang leh identity hrang nei mah se, Mizo/Zo identity chuan a khungkhawm vek tih hre reng tur leh mahni culture leh identity vawng chungin inpumkhat zel turin a chah a ni.

He Programme-ah hian V. Malsawmtluanga, MLA, Vice Chairman leh High Power Committee member te; Hmar Inpui leh Hmartob hruaitu te; Martar chhungkua te; Shinlung Hills Council CEM Ricky Lalremsanga leh Shinlung Hills Council Member Lalvenhima Hmar & Vanlalsiamsanga te bakah mipui tam tak an tel a ni.