Football-ah hian pet goal a pawimawh bera chumi zawhah goal tur siam saktu hi ti ila kan sawi sual tam lovang. Kum hnih chhunga European club-a assist ngah ber chu Thomas Muller niin Messi-a’n a dawt. 

Lionel Messi hi Barcelona leh Paris Saint-Germain tana a khelh laiin solo goal mawi tak tak a thun thin a, defence tight tak karah tal putin goal mawi tak a thun kan hmu fo thin. Chutih rualin Ballon d’Or tum 7 zet dawng tawh Lionel Messi a hi midang tana goal siam saktu ropui anga hriat erawh a ni ngai lo. Mahse, he player ropui hian kum hnih chhungin tum 42 zet assist neiin European League-a assist ngah ber pahnihna a ni phak tlat. 

Messi hian pet goal lam a uar zawk avang hian a assist hian hriat a hlawh tawk lo mai zawk a, kum 2020 atang khan Messi hian La Liga leh Ligue 1 game 81 a khelhah a thian te pet goal tur ball tum 42 zet a siam sak. Hei hian goal siam saktu tha tak a nih zia a nem nghet chiang hle awm e. 

Assist 42 a neih zinga 15 zet chu PSG lama game 26 a khelh atanga a siam a ni a, a thawh rah hlu tak avang hian Paris hian 2021-22 season khan Ligue 1 title an chawi theih phah a ni. A dang 27 erawh Barcelona player a nih lai La Liga-a game 55 a khelh atanga a siam an ni thung. 
    Kum 35 a upa Messi hi 2021-22 khan Ligue 1-ah PSG tana assist ngah ber dawttu a ni a, a teammate zingah tluk loh pakhat chu Kylian Mbappe niin a ni hian assist 19 a nei phak a ni. 

Pakhatna Thomas Muller hi Bayern Munich player rinawm niin assist 52 a nei a, football history-a player rin thiam harsa ber pakhat chu Thomas Muller hi a ni ngei ang. Bayern Munich star hi player langsar leh lar ber chu a ni hauh lo. Mahse, club tana a tangkaina te, goal a thun theihna leh assist a ngah vang hian a hming hi hriat loh theih a ni lo. 

German star hi midang tana goal siam sak kawngah a chungnung hle a, Bundesliga match 80 atangin assist 52 zet neiin midang tluk phak rual a ni lo. 

Muller hian a zawnin kum thum chhung chu season khat chhungin assist 21 chuang a nei ziah thei a ni. 2020-21 season khan Bundesliga-ah Bayern tan khelin goal hmaah a hnawk thei hle a, a mimal record chu match 32 a khelhah goal 11 thunin assist 21 a nei a ni.