DOWNLOAD OUR APP

Read latest news on your phone
play-store app-store
app-store
ât chang nei rawh
titi ZALEN
Feb 09, 2020
ad
  • Ramchhana Hmar
  • Finna duhin, hmasawn duhin, mite ruala ke pen duhin zirna runte kan bel a, neih bak leh puk chawp pawhin lehkha kan zir thin, chutiang kara ât chang nei rawh han intih tawp mai chu, thufing tawi tia pawm theih a ni lo phawt a, a ziaktu ngei hi fin chang nei rawh tih hial tlak ka ni ngei ang.
  • Tunge àt duh tehlul ang, tunge fing lo nih duh tehlul ang, chutih rual chuan mahni luak pawh eiduh uisa eihnam kan nih chhung chuan àt chang neih hi ka ngai zeuh zeuh dawn lawm ni? Fin hi a tha, intifing kher lo ila; fin luat avanga mahni ang vek tura mi dangte kan ngaih chuan mi fing à ka ni ve thei tlat.
  • Khawvel changkan dan leh, kan ramin hma kan sawn dan ka ngaihtuah chang hian mi fing leh thil hre zau, khaw hawi zau pawh an tam ta hle mai, a chhuak thar leh a changkang hre tawk lek a, fing pawh kan insulpel nuk nuk tawh a, a fin hmel nen rin ai daihin a à/mawl tih te, a hmel en ang a ni lo, a fing phian a sin han tih mai tur lah pawh veng tinin kan kawl firfer a, à leh fing inkarah hian mi laklawh tih har em em, hre em em, changkang em em, intifing an awm a, heng mite hian kan veng, kan ram, kan hnam hi an chawk buai lek lek thin nite hian ka hre thin a. Mawl tih dawn a, a thenawmpa hriat loh thenkhat lo hre nawlh mai thin a nihna hi a inchhuan phah viau mai lehnghal a, mawl category luah tur chuan kan dah ngam chiah lo nain mi fingte bula a awm changin mi dang te titi a ngaihthlak na lama ka ang huau leh dang ro tih reh nana chil lem kurh kurh chi an ni leh lawi a, hetiang mi hi kan chin pawh ni lovin kan ram hian a thar tam tawh em em a, ram danga thawnchhuah tlak si lovah chuan kan thar tam ber pawl a ni awm e.
  • Awle, engtin nge ât chang kan neih ang? Kan sawi fo thin hmana kan ral thlir kha tunah chuan kan bul hnaiah a awm a, kan ban duh chuan kan ban phak a, kan duh loh chuan kan hnawl maithei bawk. Internet khawvel hian min thleng pha mai a ni tawh lova, internet khawvelah hian keini hi kan inbarh lut a, kan inhnim phum a, swimming pool a nih avanga tui hleuh thiam lo pawh an zuangthla ve ngawt a, an hleuh thiam miau loh avanga harsatna tawk sawi tur an awm ang hian, he internet khawvel in min chenchilh nasat em avanga a khawih theih apiang a changkang leh awlsam kan bawh rup rup a, kan tana harsatna lo thleng thei engmah ngaihtuah lovin, engkim hi kan hmelhriat tum a, internet khawih tura pawisa a ngaihreng thute lah chu kan hre lo der tlat a. Chu pawisa nei tur chuan hnathawh angai tih lam chu ka hre lo der tlat bawk a, chuvangin hnathawk tha peih mang si lovin, internet kal tlangin kan bazar a, kan chat a, a thenin kan live a, a then kan inkap a, a thenin carrom kan pen thul, heng zawng zawng hi i bula mi leh i thiante’n an tih laia ilo te ve lo a nih chuan mi changkang lo, tun lai tawng taka mi in update lo title hlawh theihna a nih avangin kan budget hre map lovin kan han hmelhriat ve ta ngawt thin a nia. A thar apiang ka hre zel a, kan fing tawh lutuk hi a buaithlak tunah chuan àt chang neih angai tawh zawk ni te hian ka hre thin.
  • Heng a chunga kan sawite khi, kan do lova, kan sawisel hek lo; mahse, inti fing te hnenah a thawkna duh phian a sin! Heng thilte hi a then chu hriat loh der ngam a, hnawl ngam ava hun ta ve, thiante’n ‘ti ve rawh, a nuam a sin’ an tih changa hnawl ngamtu nih hi a hun ta hle mai, thiante lakah chuan mi â pawh nimai ang hmiang eng nge pawi le, tuna i chhungkua, nakina inchhungkua tur leh i mamawh kha i thiante’n an pein an enkawl sak thei dawn lo che a. An laka àt te pawh chu vanram chahbi hlauh khawpna tura sual a ni dawn em ni?
  • Internet bupui keuva inhampuar ringawt hi a tawk lova, lehkhazir leh lehkhabu chhiar tam lamah te hian tan ila thar teh ang u, tun laiah central service lama lut Mizote kan tlem avangin tan kan ngai a, IAS, IPS, IFS adt. te phei chu Mizo hming lang lova, hnamdang result bu kan keuna kum pawh a tam ve ta. Tin, coaching kal te kan intihhmuh viaua a tha e. Coaching kal ngam central service-a tling tumte tan ngat phei chuan fin duh reng reng loh tur a ât a chhuak a, lehkhabu a chhiar reng mai min ti hial rawh se, eng nge pawi chuang. Central service a ni emaw MCS te pawh ni rawhse hetianga inziaktling tur hian whatsapp group-a thu thar ber ber anga lang belhchian dawl leh mang si lo hre thei fu te, copy past thiam riau te hian chance an neihsan phah chuang lova, kan ram leh tualchhunga thilthleng langsar chu daily news-ah te chhiar tur a awm reng a. Hengte hi chhiar tam ila, a chhuak hlui deuh a nih pawhin ila chhiar lo a nih chuan i tan a thar vek a ni tih hria la, hmaih neih miah lovin han chhiar mawp mawp mai la, hriat tum la, vawn reng tum bawk la. I lehkhabu chhiar hlanin i thiante chuan an thuthmun atangin ral tam tak pawh an lo that ang hmiang, carrom (mobile game) hmangin sum tam tak pawh lo hlawh mah se, chawimawina eng nge an dawn chuan le? Kha an pawisa hlawh khan buhfai kg 1 pawh an leithei lo tih i hriat kha, tun laiah chuan a hnawltu zawk hi à nihna neitu kan ni fo thin, chawimawina tak leh a tak taka ngaihsan nih i duh chuan àt chang neih a, taima taka lehkha zir te, lehkhabu chhiar tam te hi a bul tanna tha zawk chu a ni dawn lawm ni.
  • Mi fing nih a nawm rualin engtik lai pawh a fing nih chu a that lohna chin a awm ve tlat, status leh story khawvel hi kan ngaina a nih pawhin a zunah uai kher lo ila, A AW B leh A B C-in a hrinchhuah lehkhabu tha tak tak hi chhiar tam ila, finna lairil chuan min luhchilh thuai mai dawn a ni. Vengchhung chanchinbu pawh chhiar zo tha peih loh khan coaching centre tha kan mamawh, lehkhabu tha chhiar tur ala tlem ti ngawt lo la, thawmhnaw leh thil dang tha tak tak i chah thlen zut zut ang khan lehkhabu tha hi a chah thlen ve thei a sin! Internet khawvel nuam i tih pawhin i tuipui zawng kha thlak ngam la, i mamawh zawng thiam ang che, heng kan sawi atang hian tun atangin nang leh kei hian àt kan so a hun tawh takzet a, a hniak tam lam lam zui dul dul nun atangin à takin kal fal ngam a va hun tawh em!

Latest News & Chhiar Hlawh