Argentina leh Inter Miami forward Lionel Messi chu Time chanchinbuin Athlete of the Year atan an thlang.

Messi-a hian July khan Miami zawmin vawi 14 a khelhsak tawhah goal 11 a thun leh der tawh a, Leagues Cup-ah champion-puiin an club-in an din atanga nomawi an lak hmasak a ni nghe nghe.

Kum 36 mi hian October thla maiah khan khawvela footballer chawimawina ngaihhlut hlawh ber, Ballon d’Or chu a vawi riat nan a dawng bawk.

“Lionel Messi hian kuminah hian tih theih loh ang hiala lang a hlen chhuak a, Inter Miami-a zawm atang khan US chu soccer (football) ramah a inlet nghal a ni,” tiin Time chuan an tar lang.

Chanchinbu hian US-a Messi a thlen atangin MLS entu an pung a, ticket man a sang sawt a, inkhel kaihhnawiha sum vir vel leh online-a entu an tam phah hle niin a tar lang.

Striker Messi-a hian gymnast Simone Biles, swimmer Michael Phelps leh NBA superstar LeBron James te hnung zuiin chawimawina hi a dawng ve a ni.

Paris St-Germain-a a contract hmang zova a chhuah khan Messi-a hian a naupan lai atanga a awmna, Barcelona zawm a duh a; mahse, a thei ta lo.

Miami-ah nge a hma season hnih liam ta chhunga ram dang player lei nana inseng nasa tak, Saudi Pro League a pan zawk dawn tih titi a tam hle bawk.

“Ka duhthlan hmasa ber chu Barcelona-a kir leh a ni a; mahse, a theih ta lo,” tiin Time hnenah hian a sawi a. “Kir leh ka tum a, a thleng thei ta lo,” a ti.

“A hnuah khan an ram ka hriat chian leh inelna a sanna, nakin lawka league pawimawh tak tur ni bawk, Saudi league-a kal tur nge tih pawh ka ngaihtuah nasa hman hle bawk.

“Saudi Arabia leh MLS te kha a pahnih hnihin ka ngaihvenin kal ka chakna ve ve a ni,” a ti.