Tun hnaiah Ronaldo leh Atletico Madrid te sawi zawm mek an ni a, mahse Atletico fans te chuan, Ronaldo an duh lohna lantirin pre-season friendly an khelhnaah 'CR7 not welcome' tih banner an tar khum hmiah. 

Nimin khan Estadio Muncipal de El Burgo de Osma-ah Atletico leh Numancia te chuan friendly khelin Atletico hi si li faiin an chak nghe nghe. He inkhela mit la ber zawk erawh, Atletico fans mi engemaw zatin kum 37 mi Ronaldo lakluh an duh loh zia lantirna hun an hmang a, Ronaldo chu an welcom loh thu thuziak lian tak an keng chu a ni. 

An club hmelma hlun Real Madrid star thin Ronaldo hian a football thiamna hmangin vawi tam tak Atletico supporter te a vel tawh a, chuvangin Ronaldo hi an la lawm tak tak thei lo niin a lang. 

Atletico Madrid president Enrique Cerezo pawhin Ronaldo an lak theih lohna chhan lian ber tura a ngaih chu Real Madrid nena an kar boruak chhit thin vang a nih thu a zep hran lo. Portguese player Ronaldo hian Bernabeu lamah kum kua zet hun hmangin, 2009 atanga 2018 thleng kha a khel a, club hristory-a goal khung tam ber a ni bawk.

Champions League chanchina player hnuhma nei tha ber Ronaldo hian, Champions League khel phak club a khelh ngei duhin Manchester United hi chhuahsan a duh thu a sawi tawh a, United-in USA lama pre-season tour an neih-naah pawh a kal ve duh lo a nih kha.