A changtute an thain shooting pawh Thailand-ah an han nei a, hei zet hi chuan ngaihven a hlawh lo thei lo. Wayward Production kut chhuak Mizo film nghahhlelhawm tak 'The Sky is Our' chu August 2 hian tlangzarh a ni dawn ta. He film hi Mizo film puitling, India ram pawna an shoot tlem te zinga mi a ni.

The Sky is Ours hi November 2023 atanga shoot tan kha niin, tunah chuan release tura peih fel a ni tawh. An OST, 'Thlah lo turin' tih pawh tihchhuah a lo ni tawh a, tun lai band lar, Lilac and Jacks te sak a ni nghe nghe a. Film siamtute hian theihtawp an chhuah a, senso hautak deuh mah se rualawhna avangin Thailand-ah shooting an han nei thei a ni.

A musical score leh foley hi Lalsangliana Zadeng (SLA Production), Leeds, UK-a awm mek kutchhuak a ni a, a movie lan dan leh an thawmhnaw hak thlengin an uluk hle.

Estee Lauder Beauty Advisor lo ni tawh, Dina Varte chuan make up a khawih a, Lalrinenga (Vavoo Interior)-in set design a khawih bawk. An scene mila thawmhnaw hak tur thlangtu (stylist) hi Andria Fanai a ni. Hetiang taka an uluk avang hian Mizo Film Industry-ah a tha zawnga hnuhma hnutchhiah ngei an beisei a ni.

Zonet Empai-a tihchhuah turin, Wayward Production leh Zonet Tv Pvt. Ltd., chuan ni 25/6/2024 khan inremna an ziak a, Zonet chuan awlsam taka mi tam zawkin Zonet Empai atanga an en theih nan Online Payment bakah Mizoram hmun hrang hrangah voucher hmanga lei theih tura zawrh an tum a ni. Movie app lar Lersia Play-ah en theihin a awm bawk ang.

A changtute

Mizo film budget sang ber pawlah hian Mizo Model lar pathum - Lalrinzuala, Kima Hmar leh Christina Pautu te an chan bakah, India rama Foreign model hlawh sang ber lo ni tawh, Brazilian model Chris Rodrigues a chang bawk.

Anni bakah hian Mizo actor thawm nei lian tak, Timothy Vangchhia a tel a, Henry Hmangaihawma, Lalduhawmi leh Miss East India 1995 Runner Up Zikpuii Sailo te an inlan dawn bawk. Tleirawlte star rawn Timothy Vangchhia hi 'Black Rose'-ah khan hnehsawh btakin a lo inlan tawh a, talent a neih that zia hai rual a ni lo. Tun hnaia Mizo film Industry-a hming langsar em em Maruata Rawite leh Sangsangi te an inlan cheu bawk.

He film hi Jeremy Hauhnar Direct a ni a, Director of Photography (DoP) pawh Jon Mizo a ni - an kutchhuakin belhchian a dawl dawn. Executive Producer Lalsangpuii Hnamte niin, Zaithanmawia leh David Lalmuanpuia te produce a ni.

Chhungkuaa en theih tur PG ratings bakah, 18+ ratings a hrana siam a ni - Northeast audience tinzawnin English Sub-title dah a ni bawk.