Mizoram Volleyball Association (MVA) leh Central YMA chuan YMA branch hrang hrangte volleyball-a an inelna tur buatsaih tumin hma an la mek a, August thla chawhma lama khelh tan theih an inbeisei.

Inter Branch YMA Volleyball Tournament buatsaih dan tur chungchangah hian Ningani khan MVA office bearer-te leh Central YMA Sport Sub-Committee chu an inkawm a, tournament buatsaih nana tulte sawiho va, intihsiakna hi buatsaih ngei an tum a ni.

Veng leh khaw hrang hrang inelna, Central YMA volleyball tournament hnuhnung ber, kum 2022-a khelhah khan mipa team 104 leh hmeichhia team 39 an tel thei a. Mipaah hian Hunthar Branch YMA chu champion niin hmeichhiaah Bungkawn Branch YMA an champion ve thung.

MVA leh Central YMA hian inter branch volleyball tournament hi an buatsaih fo tawh a. MVA bik hian kum tina veng leh khaw inelna a awm theih nan YMA volleyball tournament a awm loh kumah inter village tournament an huaihawt thin bawk a. Nikum inter village-ah khan mipaah Khawhai Local Council champion-in hmeichhiaah Diakkawn Village Council, Kolasib an champion thung.

Tun hnaiah Mizoramah volleyball khel an tam thar a, nikuma inter village tournament-ah khan team 107 (hmeichhia 27 leh mipa 80) an tel thei a, MVA-in khua leh khua, veng leh veng inelna a buatsaih tawha tel an tam ber tum niin hmeichhia leh mipa team tel kawp thei khua/veng 17 zet an awm bawk a. Kumin YMA volleyball-ah pawh hian tel an tam leh ngei rin a ni.

MVA hruaitute hian Zirtawpni khan MZP hruaitute an kawm bawk a. Tanghova August thla tawp lama Inter Higher Secondary School (Boys & Girls) Volleyball Tournament buatsaih an tum bawk.