Vawi hnih champion tawh, Rafael Nadal chu kum khat dawn inhliam vanga khelmual a luh theih tawh loh hnuah Australian Open-ah a inlan leh thei dawn ta a, Nick Kyrgios erawh January-a inelna turah hian a tel thei dawn lo thung.

Kum 37 mi, Nadal-a hi nikum Australian Open-a a inhliam hnuah khan a inkhel leh thei tawh lo.

World No. 1 hlui hian tun hnaiah khan January-a Brisbane International-ah a kir leh tur thu a lo puang tawh a ni.

Hetih lai hian Australian Kyrgios chuan kumin chhunga major pali a khelh theih loh hnuah an rama inelna lianah hian a la tel thei dawn lo.

Kum 28 mi, kum 2022-a Wimbledon finalist hi a banrek, a khup leh ke a tina a, thla hmasa khan kir leh hnaih a beiseiawm thu sawi mah se a thei dawn ta lo.

Defending champion, World No. 1 Novak Djokovic chuan Australian Open-a vawi 11 a champion tawhna leh Grand Slam nomawi 25 a lak tawh belhchhah tumin a inlan dawn bawk.

Hun rei tak a elpui lo ni tawh, Nadal-a hian Grand Slam nomawi 22 a la tawh a, May thla khan kum 2024 hi a kum tawp 'a nih theih thu' a lo sawi tawh.

Hmeichhe lama World No. 1 Iga Swiatek leh champion lai, World No. 2 ni bawk, Aryna Sabalenka te pawh Melbourne Park inelnaah hian an inlan dawn bawk.

Hetih lai hian champion lo ni tawh zinga mi - Naomi Osaka, Caroline Wozniacki leh Angelique Kerber te pawh an fate an tlei deuh tak avangin an inlan thei dawn bawk.

Great Britain atangin Andy Murray, Cameron Norrie, Jack Draper, Katie Boulter leh Jodie Burrage te pawh an inlan ang.

Australian Open hi January 14-ah tanin January 28-ah mipa final khelin khar a ni ang.