Novak Djokovic chuan a tawn khât tak thil tawngin Australian Open semi-final-ah Jannik Sinner a hneh lo va, Grand Slam-a hnuhma ropui tak hnutchhiat tawhtu hian ‘a khelh chhiat ber zinga mi’ a nih thu a sawi.

Serbian Djokovic hi 1-6, 2-6, 7-6 (8-6), 3-6-in a tlawm a, Melbourne-ah kum 2018 hnua a vawi khat chak lohna niin Sinner-a hian vawi 33 a chak zawn a tihtawpsak.

Grand Slam champion vawi 24 ni thei hian Margaret Court-i nena an innih rual mek chu tlansan tum hle mah se tunah rih chuan a thei ta lo.

“Khatianga khelh kha chu pawmzam a harsa hle a ni,” tiin kum 36 mi, Djokovic chuan a sawi.

“Chutih rual chuan kei aia kawng engkima titha zawk, Sinner-a a fakawm hle a ni,” tiin a hneh loh a fak bawk.

Set li khelha chak ta lo, Djokovic-a hi mipa World No. 1 a la ni chhunzawm dawn tho va, season liam taah khan major tournament palia pathumah champion-in a season hman that ber zinga mi a ni.

Melbourne Park-ah erawh chawlhkar hnih chhungin nikum a phak lo va, Italian Sinner lakah pawh a bet zawk a ni.

Djokovic hian vawi 54 zet tihsual a neih laiin vawi 32 chauh vuak dik a nei a break point pawh vawi khat mah a nei zo lo.

“Tha taka a khelh avang leh pui taka tournament a khelh avangin Sinner-a ka lawmpui a. Final thlen hi a phu a, kawng engkimah min hnuaichhiah a ni,” a ti.

“Ka khelh dan khan min barakhaih hle a, set hmasa pahnih ang kha ka ni thei lo. Grand Slam-a ka inlan ve tawh china ka khelh chhiat ber tum zinga mi niin ka hria,” a ti.

Tun hmaa Australian Open semifinal vawi 10 a khelh tawha chak vek thei chuan tuna a chak loh avangin a hnual lo tih a sawi a, “Slam dangah te, Olympics leh tournament dang dangah pawh beiseina ka la nei a, tun hi chu season bul tanna chauh a ni,” a ti.

Djokovic-a hian May thlaah kum 37 a tling mai tawh dawn a, tennis-ah hian a tawn tur ang chi ang zawng zawng chu a tawng tawhah a ngaih theih a; mahse, tum dang a la nei.

Thla hmasa khan kum 2023 season aia thaa chet a tum thu sawiin, “Grand Slam pali leh Olympic gold a lak theih,” tiin nui chungin a sawi.

Kumina Grand Slam pali lak erawh a thei dawn ta lo phawt a, chutih rual chuan Grand Slam maltan nomawi la hnem ber nia Court-i tlansan theihna hun tha a la nei a. Ram tan Olympic gold medal awrh theihna a la nei bawk.