India rama lirthei leh a kaihhnawih chanchin ziaktu, automobile journal lian, Autocar India-in ram pum huapa lirthei chungchang sawihona hun a buatsaihah Mizorama Maruti Suzuki Dealer G.I.G Motors CEO John Lalpeka a chu panelist-ah telin Mizo zinga a hmasa ber a ni.

Autocar India hian India-a lirthei siamtute hmasawn dan leh a nghawng chi hrang hrang sawihona hun hi Vivanta Hotel, Guwahati-ah Zirtawpniah buatsaihin Mizoram atangin John-a hi panelist-ah a tel a ni.

Renuka Kirpalani, Consulting Editor, Autocar India kaihhruai Autocar Regional Dialogues-ah hian 'How Green are Dealerships?' tih thupui hmangin lirthei siamtute hmasawn dan bakah lirthei siam chhuahin ram leh mipui a nghawng dante an sawi ho va, India ram hmun hrang hrang atangin sawm bikte an tel.

Autocar India chanchinbu hi UK-a Haymarket Motoring Publications Ltd-in Autocar an tihchhuah hnuaia mi niin India-ah hian Haymarket SAC Publishing (India) Pvt. Ltd. leh Sorabjee Automotive Communications tihchhuah a ni a. India-a lirthei kaihhnawih chanchinbu rintlak bera ngaih a ni.