Aizawl; July 26&27,2014 khan India ram hmun hrang hranga Chakma tlawmngai pawl aiawhte chu Silchar-ah intawkkhawmin 'All India Chakma Convention' an nei a, Chakma NGO-te inthlunzawmna 'Chakma National Council of India,' din nghalin, Mizorama Chakma-te chu Autononomous District Council thuneihna hnuaia an awm vek theih nan hmalâk an rel. All India Chakma Convention palaite chuan Mizorama Chakma ten tun aia hma an sâwn theih nan sorkar laipuiin ralkhat atangin enkawl se an duh tih sawiin, "State-a hnam dangte nen an dinhmun a intluktlan hma chuan sorkar laipui thuneihna hnuai a awm kan duh a ni," an ti. Hei bakah hian Bangladesh ram chhunga awm Chittagong Hill Tracts India ram chhunga rîn luh leh a nih theihna turin hmalâk ni se an ti bawk a. India ram state thenkhatah Chakma te'n an chanvo dik tak an chang lo nia sawiin, "Rajya Sabha-a Petition Committee-in 105th recommendation a siam angin Arunachal Pradesh-a Chakma-te'n khua leh tui nihna an neih theih nan Chakma National Council of India-in a tul angin hmá la rawh se," an ti. He intawhkhawmnaah hian palai 200 vel an tel a, 'Chakma National Council Of India,' chairman lailâwk atan Er. Anirudda Chakma an ruat nghal.