ZALEN August 24, 2026 : Chief Minister Lalduhoma chuan Autonomous District Council (ADC) pathum — Lai Autonomous District Council, Mara Autonomous District Council leh Chakma Autonomous District Council — te tana inhmantawm tur 'Recruitment Rules' siam tum a nih thu leh Anti-Defection Law siam a ni dawn tih a sawi.

Zirtawpni kaltaa Siaha DC Office Complex-a District Pisapui Building thar hawnna inkhawmah thu sawiin Chief Minister chuan Autonomous District Council-te sum hman dan kalphung chu a ruh langa sawiin, District Council-ten sum an hmuh tlingkhawm zaa 97.14 zet chu sorkar hnathawk hlawh atan an hmang ral thin a, LADC phei chuan sum an hmuh zaa za zet hmang faiin, CADC pawhin zaa 97.96 an hmang bawk tih a sawi a.

Kudam pakhat enkawl tur phei chu Grade IV (Group D) panga lai te an dah hial thu sawiin, vote zawn nan leh sorkar hnahnawk tur inlak belh zui zel nana insem ringawt kalphung chu kalpui zui zel theih a nih tawh loh thu leh he thil hian tunah sorkar luhai a tiru hle a ni, a ti.

He buaina sukiang tur hian Chief Secretary kaihhruaina hnuaia Study Team leh Lunglei DC kaihhruai Enquiry Commission-te report bawhzuina atangin Larsap chuan thutlukna a siam ta tih chief minister chuan a sawi a. District Council-te an tlukchhiat lohnan an sum dawn zawng zawng atanga zaa 60 aia tam chu sorkar hnathawk hlawh atan hman phal a ni tawh dawn lo tih a sawi.

Heng thil bawhzui tur hian sorkarin special team a din dawn a, Recruitment Rules pawh District Council pathum tana inhmantawm tura siam a ni dawn a. Larsap thutlukna leh duh dan thara hma lak a nih hunah hna thawktu tam tak ban an ngai dawn tih Chief Minister chuan a sawi bawk.