James Cameron kutchhuak 'Avatar: The Way of Water' chuan India ramah thawm a nei ring hle a, theatre-a an tihchhuah ni hmasa berah cheng vaibelchhe 40 zet a lalut nghal hem mai.  

Avatar thar hi December 16, Zirtawpni khan India-ah tlangzarh a ni a, theatre hrang hrangah pek chhuah nghal a ni. Tlangzarh atanga a ni khatnaah hian vbch 38-40 inkar vel lalut anga chhut a ni a, hemi a nih chuan Avengers: Infinity War a khum tihna a ni. Avengers: Infinity War khan a ni khatnaah vbch 31 a lalut a, Spider-Man: No Way Home pawh khan vbch 30 vel a lalut bawk.
Avatar a rawn chhuak a, rinlawk leh beisei ang ngeiin Avengers hi a rawn khum. Ni khat thil thua sum lalut hnem ber erawh Avengers: Endgame kha a la ni reng. 

American superhero film Avengers: Endgame hi kum 2019 khan tihchhuiah niin, vbch 53 zet a lalut. Hei hi India bikah chuan record a la ni reng a, khum pawh a harsa rih viau mai thei. Hetih lai hian khawvel huap chuan Avatar hmasa ber khan box office-a sum lalut hnem ber a la ni a, tluklehdingawn 2.9 zet a lalut tawh a ni. 

Avatar: The Way of Water hian tlangzarh hma hauhin ticket pre-sale atangin $mtd 17 a lalut a, a sum lakluh hi a sang tawh viau mai thei - Avar chhuah hmasa a khum thei ang em tih chu hriat chakawm tawh tak a ni. Avatar: The Way of Water hian tun weekend chhung hian $mtd 145 atanga $mtd 179 vel a lakluh hman rin a ni.