Aizawl: Association for Voluntary Blood Donation (AVBD) chuan kumthar April 2018 atanga March 2019 inkara a thlawna thisen pe 90%-ah kaitir an tum. AVBD hian Zirtawpni khan MSACS Conference Hall-ah executive meeting neiin Mizoram puma a thlawna thisen pek, voluntary blood donation target atan 90% a tuk a. Target tlin tur hian AVBD chuan sawrkar leh blood bank-te nen thawkhoin theihtawp a chhuah dawn a; chutih rualin, thisen petu mipui, a bikin thalaite an pawimawh ber avangin, target tlin a nih theih nan Mizoram mipui zawng zawng thawhpuiah an sawm. AVBD tarlan danin voluntary blood donation hi Mizoramah 90% a tling tawh thin a, 94% hialte pawh a tling tawh a. Mahse, tun hnai kum 5 vel kal ta atang khan a tlahniam leh a, chumi hnuah, tun hnai kum hnih vel atangin a thang chho leh a. Kum 2016-17 chhunga voluntary blood donation chu 83.27% a ni a, financial year hnuhnung ber, kum 2017-18 chhunga voluntary donation chu 83.36 niin, a hma kum aiin 0.9%-in a pung hret niin an sawi a. Kohhran thalai pawl hrang hrang te, YMA leh NGO dang te, zirna in hrang hrang te, political party lam te, sawrkar department hrang hrangte chu mi dangte nunna chhanna atana thisen pek uar turin an sawm.