Dr. C. Lalrampana

A KAMKÊUNA: Kuhva rah hi a scientific hming chuan Areca catechu tih a ni. Saptawng chuan  ‘Betel nut’ a ni tih kan hre theuh awm e. A kung san zawng hi 20m a sãng, tehkuala 20-30cm diameter vela lian a ni tlangpui. A rah hi 4-5 cm-a sei a eng leh serttlum rawng a ni. A chhunga a rah kan tih ber artui anga mum sãwl, (ellipsoidal) hi 3-4*2-4 cm a ni. 

Khawvel pum pui thlirin kuhva rah lãwnga thial ching an tam hle. Hetianga a lawnga thial thin hi ka chhung hrisel nan, chaw ei tituitu atante tha hlea ngaih a ni. Hei bakah hian ka chhung pãn (mouth ulcer) leh cancer vengtu tha tak a ni thei bawk. Kuhva rah hring hi rulhut kawm (tapeworm) leh vawk rulhut kawm (pork tapeworm) thattu tha tak a ni a; rulhut damdawi Albendazole aimaha chak leh tha zawka ngaih a ni hial. Asia chhim leh Asia chhim chhak leh Asia Pacific, Guam leh Pacific thliarkar dangahte kum 2,000 kal ta vel khan an lo ching uar tawh hle.

Khawvel pum pui mihring thlirin kuhva ei thin hi 20% vel an awm mek a ni. World Health Organization (WHO)-in a tar lan danin mi maktaduai 600 velin kuhva hi damdawi avanga rilru buaina (psychoactive) neiten inenkawl nan an hmang thin a ni. Zu leh tur (nicotine, alcohol & caffeine) avanga harsatna neiten an tangkaipui hle bawk. Hetih lai hian ram eng emaw zatah chuan kuhva heh uchuak an awm thin avangin hrisel lohna thlentu a tling mek bawk. Kuhva rah, a zung leh a hnahte hi tunhma atangin inenkawl nan an hmang tangkai hle thin. Ruih theih thil chi khat ni mah se hetiang khawpa tangkai leh thei tui tak a nih avang hian Asia, India etc.-ahte sumdawn nan kan buaipui luih luih ta chu a ni ber a, enge a chhan thlir zau ve lawk teh ang.

CONTRABAND A NI EM?: Ram pakhat atanga phalna lova ramri pela sumdawnna bungrua lakluh leh lakchhuaha sumdawnna hi  ‘smuggling’ tih a ni a, ‘contraband’ emaw ‘illicit’ erawh chu bungraw chi hrang hrang ram pawn atanga lakluh phal loh item chi hrang hrangte hi a ni. Kuhva pawh hi ‘contraband’ zinga tel a nih hmel hle. Ruihtheihthil chi khat ni mah se narcotic/heroin/opium/Methamphetamine, ganja leh ruihlo dang ang êm êmin India sorkar hian a khap chuang lem lo. Zu pawh hi India danpuiah khapna a awm hran lem lova state tinte zalennaah a dah mai zawk a ni. 

India hian Myanmar nen inremna ziakin kum 1994 khan myanmar atangin 40% tariff free kuhva lakluh a phal a. Hetih lai hian 40% tariff free kuhva chu India sorkar phalna lovin Indonesia atangin Myanmar kaltlangin  lakluh a ni tih India Sorkarin a hriat chhuah avangin kum 2018 khan he inremna hi tihtawp lailawk (suspended) a ni ta rih a ni. 

KUHVA LAKLUH ZÃT: Nikum 2021 chhung khan kuhva 1,108.97 metric tons chu Indonesia atangin Myanmar kaltlangin India ramah lakluh a ni a, a hlut zawng hi India tangkain Rs maktaduai 358 man hu niin heng atang hian 976.37 metric tons chu  India’s customs-ten an man a; hetih lai hian agencies dangten 132.60 metric tons an man ve thung. Kuhva avanga thubuai nei 79 an awm mek nia hriat a ni. Kuhva hi Mizoram leh Manipur bakah Assam-ahte a lut a, kum tina hmarchhak state-in kuhva tawlhruk a lakluh hlut zawng chu cheng vaibelchhe sanghnih zanga (Rs 2500 crore) niin chhut chhuah a ni. Hei vang hian sorkar laipui a mangang hle  a ni ngei ang Delhi tlang atangin kuhva lakluh khapna dan khauh tak siamin N.E States-Assam, Manipur & Mizoram sorkarte hriattirna a pe ta a ni.

TUTEN NGE FIR THEHLUT?: August 24, 2019 khan Assam Police chuan case No 1282 IPC Sec.120B/465/468/471/420  hnuaiah Jhalukbari police station, Guwahati-ah kuhva tawlhruk case F.I.R an ziak lut a, FIR thehluttu Abhijit Basumatary sawi danin kum 2015 atang khan nitin kuhva truck trip 200  Bangladesh, Myanmar leh China atangin Assam leh West bengal ramri hnaivaiah import duty leh custom bill tel lovin lakluh thin niin a tar lang. A sawi zel danin he kuhva tawlhruknaah hian sorkar official pawimawh (bureaucrats) an inrawlh ngei a, Silchar, Karimganj lam an in a, an hming leh nihna a tar lang bawk. Shillong lamah minister-te kutke berte hming a tar lang bawk a, official ni lo sawrkara mi thil ti thei tak takte hming a tilang bawk. An hming leh nihna nen lam a tarlang ta phiar phiar mai a ni.

Hei mai bakah hian  political party hruaitu lawk tak tak Congress, BJP, AIUDF-te pawh inrawlhin dan lova kuhva tawlhrutute an thurualpui ngei niin a FIR thehluttu hian a tar lang tel bawk.

December 18, 2021 khan Champhai DC chuan Ministry of Home Affairs lehkha No.1/32/2019-BM-II dt. 13.11.2019 leh Mizoram sawrkar Home Department lehkha No. D.32021/9/2019-HM dt. 2.12.2019 atangtea kuhva tawlh ruk titawp tura hma a lakna avangin kuhva truck trip 3 hãl a ni a; hemi chuchangah hian kuhva neitu Pi Lalhruaitluangi, Aizawl Chaltlang Lily Veng chuan Champhai police station-ah a kuhva hãltute zawng chhuak tur leh engvanga hãl kher nge an nih tih hãichhuahsak turin FIR thehlutin a ngen a. Tichuan, police-ten FIR chu ngai pawimawhin an lo registered nghal niin a lang. He thubuai kal zelah hian Zoram pumah titi lengvak (rumor) a tam hle a, sorkar official pawimawh tak takte pawh inhnamhnawih niawm taka sawi a tam hle bawk. 

FIR INANG LO: August 24, 2019-a Assam Police-ten Abhijit Basumatary FIR thehluh an lo registered kha chu India rama kuhva chingtute tana hamthatna tur liau liau a ni a, dãn lova sumdawngte thurualpuia inhnamhnawihte pawh an hming, chenna leh nihna nen lam chiang takin a ziak thei a ni. 

Kuhva tawlhruk kaihhnawiha Mizoram Police-in FIR a dawn an registered ve thung erawh khi chu India rama kuhva chingtute hamthatna tur ni lovin ram pawn atanga kuhva chawluta sumdawngtute tana hamthatna tur liau liau a ni thung.  Pi Lalhruaitluangi FIR thehluh chungchanga thil intihre tak taka smuggler-te thurualpuitu bureaucrats leh politician tam tak inhnamhnawih awm anga sawi thawmte hi tak tak a nih ngai chuan Abhijit Basumatary ang hian FIR fiah fai kek kawk siamin hmanah khan thehluh daih tawh awm tak? Mahse, chutiang chu tun thlengin hriat tur aw zawng a awm si lo. Social activist Pi Vanramchhuangi @Ruatfela Nu pawh hian, “Kuhva hi contraband a ni chiang” titi ringawt lo hian smuggler-te leh mi dang inhnamhnawih ngei nia a hriatte lakah engvangin nge FIR theh mai loh? Kan awm dan hi chhut ngun a van ngai êm! Abhijit Basumatary ang hi chuan kan state hi kan hmangaih tak tak tawk lo deuh niin a lang. 

A TLÃNGKAWMNA: Kum 1994-2018 chhung zawng kha chuan kuhva hi Myanmar atanga lak luh phal niin imported list-ah telh a nih hmel a. India & Myanmar inremna baka Indonesia lam atanga a ruka lak luh a nih tak avang leh Covid-19 hripui leng avang te, Myanmar ram a buai avangtein ramri insumdawntawnna khar a nih hnuah kuhva hi ‘contraband’ a ni ta chauh zawk niin a lang. 

Ei leh bara kan intodelh loh tehlul nen, kuhva, sikret, thuamhnaw, bungbel etc. khawchhak lam  atanga lokalte hi chhungkaw tam takin ei bar hmuh nan an hmang a, an tangkaipui hle. Theih chang se  Mizoram sorkar hian Made in Mizoram tih belin phailamah nam lian zung zung ila kan intodelh phah anga a tha viau tur a! Mahse, a ni thei bawk si lo. Kuhva pawh kan rama thar chhuah kan sawi khu vut a, state dang ram pawn lama supply leh export tham tak tak thar tur chuan vana rah ang a la niin a lang. Chuvangin, bel ruak ang maia luruh ring chiam ringawt lo hian thil dik lo leh tha lo chu a takin ngawi rengin bawhzui chat chat thin ila Zoram nuam kan siam thei  zawk ngei ang.