Awmpui dikna chanvo thehdarh tura pawl din Ferrando Domestic Worker’s Alliance (FDWA) te chuan mi ina awm thin ‘awmpui’ te chu agency hmangin rawih ni tawh se an tih thu an sawi chhuak a, awmpui te chu mi ina awm an nih avangin dinhmun hlauh thawn awma an din chang a awm thin niin chanchinbumite an hrilh bawk a ni. Awmpui (domestic worker) thlavang hauhtu pawlin an rawn sawi hi kan ram angah chuan thil thar  a ni a, uluk taka buk ngai niin a lang a ni. A ruaitute chenna in hi awmpuite tan chuan an hnathawhna hmun ‘office’ a nih avangin a ruaitute lam pawhin an hnathawhna hmun zahsak thiam a pawimawh khawp mai. Hnathawhna hmuna a thawktuten dikna chanvo an neih ang chiah hian awmpuite pawh hian an nei a ni. Khawpui zawka awm te chu min puitu emaw min awmchilhtu emaw tel lova awm thei lo an ni tawh a. Mahni in lum chhuahsanin awmpuite hi mi inah an lut rawih a, an luh hmain lehkha inziahfelna pawh a awm loa, inchhunga enkawl an nih dante pawh pawn lam atanga in hriatpui a har avangin a nihna bakin chhawr an ni em? A hunah hlawh an pe thin em? An zahawmna tihbawrhbansak an ni em? tih te hi chhansak a harsa ang reng khawp mai. Zirchianna chu la awm chiah lo mahse Mizorama awmpuite hian eng emaw chen chu harsatna an tawk a, hrehawm taka an awm chang a awm a rinawm khawp a. Thenkhat chu khawsak harsa tak tak an nih avangin sawichhuak ngam loin an awm fo thin a nih hmel a. Hemi a nih avang hian an thlavang hauhtu pawl an awm tih te hrilh hriat an ngai hle a ni. Hetih rualin hian a ruaitute dinhmun pawh hi bihchiansak ngai tho a ni a. Tuna a lan danah chuan awmpui mamawhna a san avang hian awmpui tam zawk hi chuan a ruaitu turte an thlang zaih zaih ni ber hian a lang a. Hlawh chungchangah pawh an duh zah zah inchhiarin a ngam sang berte hnenah an lut mai ni hian a lang a. A ruaitute nen inziahfelna fumfe a awm loh avangin an duh hunah an bang/chhuak a, a then phei chuan an mahni ruaitute ngei te an rawk fo thin a ni. Heng bakah hian awmpui tlemte zinga tar enkawltu an enkawla te nghaisa thin te pawh an awm lehzel tawh a ni. Thil tam tak pawh a awm ang. Hetiang hi kan dinhmun chu a ni a. Mi ramah chuan awmpui inrawih dan hi mumal takin kalpui a ni thin a, hei hi a ruaitu leh awmpuite tan a that zawk vang a ni fo thin a. Kan ramah pawh hian mumal zawk leh awmze nei zawka awmpui inrawih dan hi ngaihtuaha hmalak a hun ta viau a ni.