India danpui Article hnuaiah Comptroller and Auditor General (CAG) of India din a ni a, a hnathawh ber chu sawrkar laipui leh state sawrkar hnuaia sum hman dan chevel te a dik leh dik loh enfiah a ni ber. An hnathawh hi a pawi-mawhin an dinhmun pawh a sang a, India rama lal dan indawt ‘order of precedence’-ah pawh 9-na dinhmun an hauh pha a, Supreme Court Judge te nen an intluk pha hial a ni.
Comptroller and Auditor General (CAG) of India hi tan lam nei lova dik taka thil ti tura beisei a ni a, an thil hmuh chhuah leh report an siamte pawh uluk taka tih a nih avang leh enfiah ngaite pawh uluk taka an enfiah thin avangin an report pawh hi dik vek tura ngaih a ni bawk. CAG report hi sawrkarna chelhtu tan chuan a ngeiawm thin a, a chhan chu an hnathawh tha lo leh dik lo lai haichhuah anih thin vang a ni ber.
Mizoramah pawh hun engemaw chen atang khan CAG hian department leh sawrkar hnuaia public sector undertaking te hnathawh dan leh sum hman dan a enfiahin a chhui thin a, heng a chhuina hrang hrangah hian dik lo engemaw zat a hmuchhuak tawhin report-ah hian tarlan a ni tawh thin a. Department lam chuan report chhuah hnuah an thiam thu eng emaw chu an sawi ve thin. Mahse, Audit neih lai leh hun tiam chhunga an sawifiah theih thin loh avanga report-ah hian lang thin a ni a, chuvang chuan thil fel lo eng emaw hi chu a awm thin ngei tih a lantir awm e.
Comptroller and Auditor General (CAG) of India report hi a dik tura ngaih anih laia thil vanduaithlak tak mai chu thil dik lo ti nia tarlante hrem an ni thin lo hi a ni. Report hi enfiah a, a tul anga chhuizuia hma latu tur chu Assembly Committee pawimawh tak zinga mi Public Account Committee te an ni a. Dan ang chuan PAC hian bawhzuiin thil ti dik lo an awm a nih chuan a hrem tur a ni a; mahse, PAC hian an bawhzui chak thin lo nge thil tisuala puhte chunga action an lakna an puangzar lo zawk? Mipuite ngaihdanah chuan report-a tarlan bak a taka action lak a awm thin lo niin a lang a, hei hian hun kal zel turah sual a ti ngampa thei nia ngaihna a lian hle.
Tun tum session-ah pawh CAG report hi Assembly house-ah pharh leh a ni a, report a tarlan te hi PAC hian uluk takin chhuizui sela, thil ti dik lo an awm anih chuan a tul angin hremna pe ngei teh se. Hetia thilsual tite hrem loha an awm hian sual a tingampa a, hah leh sum tam tak senga CAG-in report a siamte awmze nei lo ang maia chhuah hi a fuh lo e.