Legal Metrology Department chuan thuchhuah siamin covid 19 leng chhuanlamin sumdawngte chu an bungraw lakluh harsatna denchhena an thil zawrhte tito lo turin a hriattir a. Maximum retail price aia sangin an bungrua te zuar lo turin a hriattir a ni. Hei bakah hian buk dik loa bung rua zuar lo tur leh hralh lo turin sumdawngte a hriattir bawk a. Hetiang ti lui an awm a nih chuan pawisa chawitir leh lungin tan tir thlenga hrem theih an nih thu an thuchhuah ah a tarlang bawk a. Hetiang tawng an awm chuan mipui te chu an lungawilohna thlen turin a fuih a, phone number te pawh a tlangzarh a ni.

Tunah pawh hripui leh kawngchhia vang in ram pawn atangin ei leh in a lo lut chak thei lo a, hripui len chhung phei chu hetiang hi kan dinhmun a nih a rinawm a ni, ni danga kan hmuh mai thin kha a vang thawkhat ta. Mipuiin mamawh an neih vanglai tak mai a bungraw man uchuak tak taka chhiar an awm thin leh a leitu lamin chan loh hlauh vanga an lei zel thin hi thil nihphung tur a ni lo a. Dan bawhchhiatna piah lamah mihring puite’n harsatna an tawh laia remchanna heti zawnga lak pawh hi a dik chuang lo a ni. A tuartu ber chu mirethei leh hnuaihnung zawk kan tihte an ni leh tho a, a pawi tak zet a ni.

Kan ramah hian thil man to tur khuahkhirhtu hi tu mawh nge ni le? tia zawhna a awm fo thin a. Tunhnaiah Village Council leh Local Council huamchhung thenkhatah chuan an thahnemngaihna avangin thil man an biktuk thin a, hetiang a thlen lai hian sawrkar lam chu a ngawi vung vung duh khawp mai. Ram pawn atanga lakluh ni lemlo tualchunga kan thar man lo tih to ringawt pawh hi enzui tham tak a awm a ni. A zuartute chhiatlohna tawk leh leitute tana na lo tur ngaihtuah chhuah hi a har viau emaw ni? Engtik lai maha khuahkhirh theih loh nia lang chu sa man hi a ni bawk a, a tel loa awm thei lo a tam zawk an nih avangin a sattu lam hian an duh ang zat an chhiar niin a lang thin a. Tunah pawh hei hi kan dinhmun chiah a ni a, sawrkar erawh a man bithliahah ngai a, thil a nih dan hi sawifiah chian a tha khawp ang.

Legal Metrology in mipui an chah ang hian buk tlinglo, MRP aia to thil zuar an awm chuan phun lungawi mai loin an mahni lam hi hriattir ila a tha ang a. A nih loh chuan dan bawhchhetute hi an ngampa zel anga mipui lamin harsatna an tawk zel dawn a ni.