Guns N' Roses frontman Axl Rose chuan mipui zinga microphone a vawrh thin chu, mipui sahim nan a titawh loh tur thu a sawi chhuak. Hetia a tihchhan hi tun hnaia an concert-ah a mic vawr hian hmeichhe pakhat hmaiah a fuh a, hliam a tawrh vang a ni - kum 30 dawn a lo chin thin tawh hi a sim ve a ngai dawn ta a ni. 

American hard rock band lar Guns N’ Roses hian November 29, 2022 khan Australia-ah concert an nei a, tum danga a lo tih thin ang bawkin an vocalist Axl Rose chuan mipui pungkhawm zingah microphone a vawrh. Tum dangah chuan a mic vawrh dawngtu nih hi an inchuh thin a, tun tumah erawh hmeichhe hmaiah tak a tla palh hlauh. He hmeichhia hi kum upa ve tawh lam a lo ni a, a mit ko leh hmai vel a duk nasa hle a ni. 

Kum 60 mi Axl Rose chuan vanduaina thleng hi pawi a tih thu a sawi a, tun hnuah chuan a zai zawha microphone a vawrh thin chu mipui himna turin a titawh dawn lo tih a tarlang. "Chiang taka ka sawi duh chu hei hi a ni, mi tumah tihnat kan duh lo. Kum 30 dawn chu show neih zawhah mipui lam hawiin microphone ka lo vawr tawh thin a, mahse tum kha a tawpna ni tawh rawh se. Min hriathiamna zawng zawngah lawm thu ka sawi e," tiin a tarlang. 

Axl Rose hian zai nan microphone chhip sen deuh va a hmang thin a, concert an neih zawhah mipui inchuh turin a vawr thin a ni.