AIZAWL: North East-a awm chhun Integrated AYUSH Hospital, Thenzawl chu hawn la ni lo mahse Thawhtanni khan inentirna, Out Patient Department (OPD) kalpui tan a ni a, hemi ni hian mi 128 an inentir a ni. Dr.C. Lallunghnema Dy. Director, AYUSH chuan Integrated AYUSH Hospital ah chuan ward hrang hrang Male Medicine, Male Medical, Male Surgical, Female Surgical, Paediatric ward leh Maternity Ward te a awm thu a sawiin hengah hian khum 55 a awm niin a sawi. Dr.C. Lallunghnema chuan Integrated AYUSH Hospital hmun atana Thenzawl thlan kher a nih chhan chu Mizoram hmun laili ber khawi khua atanga pawha pan zangkhai ber a nih vang a ni, a ti a. Tuna damdawiin awmna chu Thenzawl khaw VC ten a thlawnin ram an pek a nih thu sawiin, compensation beisei lo a sawrkar tana ram pek hian mipui tan ham-thatna nasa tak a thlen thei a nih tih hriaa khaw dang pawn a thlawna ram pek zel chu an chin chhoh zel a duh thu a sawi. Integrated AYUSH Hospital, Thenzawl hi kum 2013 khan vbc.4 senga sak tan a ni a, engkim peihfel a ni tawh chungin official taka hawn erawh a la ni lo thung. AYUSH damdawi leh thiamna hi mipui ten an chhawr tangkai ngei hi sawrkar laipui duhdan a nih angin damdawi manto tak tak pawh mipui te hnenah a thlawna sem thin a ni.